Ka përfunduar pa nisur mirë seanca e jashtëzakonshme e Kuvendit të Komunës në Prizren, sepse koalicioni në krye me PDK-në e ka lëshuar seancën, raporton Koha.net. “Meqenëse nuk kemi kuorum, e konsideroj mbledhjen të mbyllur”, ka thënë Kujtim Gashi, kryesues i Kuvendit të Komunës.
Megjithëkëtë, përfaqësuesit e opozitës kanë vazhduar të qëndrojnë në sallë, duke iu drejtuar mediave. Sipas tyre, në këtë mënyrë partitë në pozitë kanë shkelur ligjin, sepse nuk u kanë dhënë fjalën fare atyre që e kanë thirrur këtë seancë.
“Qysh kanë guxim të thirren në ligj këta që çdo ditë e shkelin ligjin me dy këmbët”, ka thënë Haziz Hodaj i LDK-së.
Opozitarët kanë thënë se nuk do të ndalen me kërkesat e tyre dhe nesër do të dalin në rrugë.
“Ky nuk është rasti i parë kur një kryetar i PDK-së dënohet, por rasti i Ramadan Mujës është i veçantë, sepse është i pari kryetar që është dënuar për keqpërdorim të detyrës zyrtare dhe insiston të mbajë postin e kryetarit”, ka thënë Artan Abrashi i Vetëvendosjes.
Partitë opozitare kishin thirrur këtë seancë të jashtëzakonshme për të diskutuar gjendjen e krijuar pas dënimit të Ramadan Mujës, që u shpall fajtor për keqpërdorim të detyrës zyrtare. Muja ka thënë se nuk do të japë dorëheqje, sepse po pret vendimin e Gjykatës së Apelit, ku është ankuar në vendimin e shkallës së parë të gjykatës./Koha.net/