Aktori i mirënjohur nga Kosova Bekim Fehmiu është përkujtuar sot në Prizren në shtatë vjetorin e vdekjes.
Jeta dhe vepra e Bekim Fehmiut u vlerësua lart nga aktivistë të kulturës prizrenase.
Gazetari Fahri Musliu e ka cilësuar Bekim Fehmiun si një Odise për të cilin janë krenar të gjithë shqiptarët.
“Bekimi ishte sinifikim i suksesit i bukurisë i forcës dhe i talentit për çdo shqiptar kudo që jeton. Ishte sinjfikim edhe i krenarisë sepse secili shqiptar mburrej që ishte shqiptar. Bekimi ia ktheu dinjitetin shqiptarit që deri aso kohe ishte mësuar që të tjerët ta trajtonin vetëm për punë të rënda fizike dhe sharrëxhinj“, tha ai.
Musliu u shpreh i zhgënjyer me mënyrën se si është injoruar figura e këtij mjeshtri të madh jo vetëm nga pushteti por edhe nga komuniteti artistik.
“Në shumë shtete të Kosovës rrugët, sheshet dhe institucionet e ndryshme janë emëruar me emra të personave që nuk i njeh as mahalla e vet por jo edhe me emrin e Bekimit. Bekimin e shpalli qytetarë nderi Shkodra edhe pse atje jetoi vetëm 3 vjet, por jo edhe Prizreni ku e kalo rininë”, tha Musliu.
Drejtori artistik i kinemasë së Lumëbardhit, Veton Nurkollari ka folur për nismën “Bekimi i Prizrenit”, dhe tha se kinemaja e qytetit do të merr emrin e Bekim Fehmiut.
“Kjo është fillimi i një iniciative të cilën ne mendojmë ta zhvillojmë, të ftojmë shumë njerëz. Ne si hap i parë do ta nderojmë me një simbolik të vendit ku është hedhur hiri i Bekimit. Ne shpresojmë të ia japim një emër kinemasë në qytet, që kinemaja e qytetit të quhet Bekim Fehmiu”, tha ai.
Nurkollari tha se Bekimi është aktori më i madh i këtij vendi dhe do ta bëjnë edhe qytetin, qytet të filmit dhe të Bekimit.
I pranishëm në këtë tubim ishte edhe vëllai i Bekim Fehmiut, Arsim Fehmiu i cili duke falënderuar ideatorët e këtij tubimi tha se Bekimi meritonte më shumë sepse kishte vlerë të madhe.
“Vlera e tij ka qenë shumë e madhe e vlerësuar prej të tjerëve e jo prej meje. Bekimi është i familjes, i kombit dhe është i Prizrenit se fëmijërinë dhe shkollimin e ka filluar në Prizren e ka përfunduar në Prizren”, është shprehur ai.
Për të nderuar aktorin e madh, Bekim Fehmiu personalitete nga kultura kanë hedhur lule në lumin e Lumëbardhit aty ku u derdh hiri i trupit të vdekur të Bekimit.
Po ashtu në kinemanë e Lumëbardhit do të shfaqet filmi “”Mbledhësit e puplave” në përkujtim të mjeshtrit të madh shqiptar.