Këngëtarja dhe tekstshkruesja britanike, PJ Harvey, ka njoftuar se do të publikojë librin e saj të parë me poezi, “The Hollow Of The Hand”, vjeshtën e vitit 2015.
Projekti 224-faqësh do të jetë një bashkëpunim me filmbërësin dhe fotografin Seamus Murphy, i cili ka punuar me Harveyn edhe në të kaluarën duke prodhuar disa video-klipe për albumin e saj të tetë, “Let England Shake”.
Pas këtij projekti të vitit 2011, dyshja udhëtoi në shumë vende të botës për të gjetur inspirimin e tyre poetik dhe fotografik për “The Hollow Of The Hand”, raporton Koha.net.
“Mbledhja e informatave nga burime dytësore nuk më flinte në shpirt për atë që doja të shkruaja. Doja ta ndjeja ajrin, ta ndjeja tokën dhe të takoja njerëz të vendeve me të cilat jam fascinuar”, ka thënë Harvey.
Libri do të përfshijë fotografi nga Kosova, Afganistani, Washington DC e më gjerë. Fotografi Murphy ka bërë disa udhëtime në Afganistan dhe ka publikuar filmin dhe një libër më 2008 në lidhje me foto-gazetarinë të quajtur “A Darkness Visible: Afghanistan”.
“The Hollow Of The Hand” pritet të lansohet më 25 tetor, 2015 nga shtëpia botuese “Bloomsbury”.