Komuna e Prizrenit po synon që “Suzi”-së në Nashec t’i japë namin e një destinacioni të ri turistik, me karakter të një vendi për piknik, raporton PrizrenPress.
“Në vazhdën e investimeve, Drejtoria e Turizmit dhe Zhvillimit Ekonomik është duke bërë planifikimin operacional të krijimit të një destinacioni të ri turistik, me karakter të një vendi për piknik, në lokacionin e quajtur “Suzi” në Nashec”, thuhet në njoftimin e kësaj komune.
Sipas njoftimit, në kuadër të këtij projekti, parashihet të vendosen ulëse me mbulojë, konstruktimi i disa urave harkore mbi një nga degët e ujit të Lumbardhit (që derdhet në Drinin e Bardhë) të cilat do të mundësojnë kalimin e vizitorëve nga njëra anë në anën tjetër, si dhe krijimi i një fushe multidiciplinare sportive të lojërave në natyrë, që do t’i përgjigjet të gjitha grupmoshave.
Ky projekt do të begatojë edhe më shumë zhvillimin e turizmit si dhe sportin e peshkimit dhe të kajakut, që tashmë janë duke operuar në atë zonë./PrizrenPress.com/
