Përmes një komunikate për media, Njësia e Trafikut Rajonal në Prizren ka njoftuar se do të filloj me zbatimin e planit operativ “Kontrollimi i transportit publik-autobusët dhe kombibusët” i cili ka të bëjë me vendosjen e rregullit dhe mbarëvajtjes së komunikacionit në rajon, kryesisht me vendosjen e rregullit në transportin publik të udhëtarëve.
Më tej Njësia e Trafikut Rajonal në Prizren njofton se gjatë analizimit të situatës në terren janë gjetur shumë parregullsi si: parkimi i kundërligjshëm i automjeteve,ndalja në vende të rrezikshme në kundërshtim me rregullat e trafikut,mosrespektimi i të drejtës në vendkalimin për këmbësorë, ndalja dhe parkimi i pavend i autobusëve, lëvizja e autobusëve me shpejtësi të vogël me ç’ rast pengohet rrjedha normale e komunikacionit,transporti ilegal i udhëtarëve, përdorimi i telefonit gjatë ngasjes se automjetit e tjera.
Trafiku Rajonali i Prizrenit bënë apel tek të gjithë drejtuesit e automjeteve që të jenë të vëmendshëm gjatë ngasjes me qëllim që t’i minimizojnë aksidentet e trafikut ku shpeshherë ka edhe jetë të humbura të njerëzve dhe dëme të mëdha materiale.