Në lagjen Marash të Prizrenit, ndodhet parku me kënde lojërash e pajisje të ndryshme rekreativo-sportive për qytetarët.
Në po këtë hapësirë, “Ec ma ndryshe” në bashkëpunim me Organizatën e Personave me Distrofi Muskulare, kanë vendosur luhatëset për personat me aftësi të kufizuara.
E gjithë kjo nismë sipas Eroll Shabanit, erdhi duke parë mungesën e gjithpërfshirjes së personave me aftësi të kufizuara në aktivitete.
“Lufta më e madhe e OJQ-së momentalisht është gjithpërfshirja e cila mungon faktikisht, qoftë nga niveli lokal qoftë nga niveli qendror, andaj EC-i ka dashur që në dy lokacione, në Marash dhe në Parkun e Qytetit, në këndet e lojërave të vendosen dy luhatëse për kategorinë e personave me aftësi të kufizuara. Janë punuar nga ‘Ec ma ndryshe’ faktikisht i kemi angazhuar mjeshtërit, por kemi marrë edhe sugjerimet e OPDMK”, ka thënë Shabani.
Më se e rëndësishme sipas përfaqësueses së OPDMK, është qasja ndaj kësaj kategorie.
Lokacioni i dytë ku janë vendosur luhatëse të tilla është Parku i Qytetit, hapësirë kjo mjaft e shfrytëzuar nga qytetarët.
Por, sipas Shabanit, vetëdijesimin për ruajtjen e këtyre këndeve nga dëmtimi, nuk është në nivel të kënaqshëm.
Kënde të tilla të krijuara së fundi në Prizren, janë mundësi e mirë e përfshirjes së plotë të kategorisë së personave me aftësi të kufizuara në aktivitete të ndryshme.