Në Prizren ka vazhduar sot pasdite vaksinimi anti-Covid.
Kryetari i Komunës Mytaher Haskuka, ka kërkuar mirëkuptim nga qytetarët për pritjet, meqë sipas tij, ka nevojë për regjistrim.
Gjithashtu ka shfaqur shpresën se do të ketë furnizime të reja me vaksina nga MSh-ja, meqë sasia aktuale është e mjaftueshme vetëm për 3-4 ditë.
“Momentalisht ne mund të bëjmë deri në 500 vaksina në ditë. Me këtë sasi që kemi, faktikisht do t’i kemi 3-4 ditë furnizim. Por mirë është që ka interesim nga qytetarët…”, ka deklaruar Haskuka.
Sot pasdite ka arritur në Prizren kontingjenti prej mbi 1 mijë e 600 vaksinave.
Ndërsa, drejtori i QKMF-së, Xhevat Elezkurtaj, ka pohuar se numri i të moshuarve të interesuar për vaksinim është në kuadër të suazave normale dhe se për të shmangur tollovitë dhe për t’i respektuar masat kufizuese po aplikohet sistemi i terminëve.
“Ne kemi bërë terminë, e kemi paraparë se sa vaksina mund t’i japim sot dhe të gjithë ata që nuk kanë mundësi dhe qasje për ditën e sotme, i kemi caktuar termin për ditën e nesërme dhe pasnesër”, ka deklaruar Elezkurtaj.
https://www.koha.net/kosove/270996/prizreni-vijon-vaksinimin-pasi-furnizohet-me-1-620-doza/