Iliri ka nxjerrë mllefin në protestën e 27 janarit. Ka hedhur gurë kundër policëve në sheshin “Nënë Terezë”. Ka sharë e fyer të gjitha institucionet.
Është kthyer në shtëpi me sytë e skuqur prej gazit lotsjellës dhe me rrobat e lagura prej ujit të hedhur nga autoblindat policore. Iliri nuk kishte besuar se do të rebelohej deri në këtë masë. Mendimin nuk e ndryshoi as kur iu kujtua se diplomën e fakultetin ekonomik e kishte në sirtar.
“Qysh me i ra pishman kur ke diplomë, por s’e ke një euro në xhep”, thotë Iliri në njërën prej kafeneve të qendrës së kryeqytetit, ku javën e kaluar u përlesh me forcat e rendit pas përshkallëzimit në dhunë të protestës së organizuar prej lëvizjes “Vetëvendosje”, me kërkesat për shkarkimin tashmë të ish-ministrit të Komuniteteve dhe të Kthimit, Aleksandar Jablanoviq, që i quajti “egërsira” nënat gjakovare të personave të pagjetur, dhe për ndryshimin e ligjit për ta shndërruar “Trepçën” ndërmarrje publike.
Mijëra të rinj janë përleshur të mërkurën e javës së kaluar për më shumë se gjashtë orë shesheve e rrugëve të Prishtinës me policinë. Protestuesit kanë përdorur koktej molotovi, shkopinj, kubëza betoni e kontejnerë të djegur bërlloku për të sulmuar policinë.
Kurse forcat e rendit kanë përdorur plumba gome, gaz lotsjellës, kërbaç, shkelmat e gurët kundër tyre. Në një moment janë dëgjuar edhe të shtëna të revoleve policore. Të dyja palët kanë akuzuar njëra-tjetrën për nxitje të dhunës në protestën e paparalajmëruar zyrtarisht në Polici.
Mendimtarin Shqiptar Oseku në Suedi e tremb “refleksi kurrizor” i pushtetit në Ballkan që kërkon të kriminalizojë demonstrimin. Ai thotë se në Bashkimin Evropian që aspiron Kosova, përditë organizohen marshime, protesta e demonstrata pa leje policore nën sloganin “Reclaim the Street”, që për të, shkurt e shqip, do të thotë “Ripushto rrugën” …/koha ditore/