Organizata Joqeveritare “EC Ma Ndryshe” në kuadër të projektit “Urbanizmi i Prizrenit nën vëzhgim të përhershëm” të martën ka organizuar tryezën e diskutimit mbi zhvillimet urbanistike në Qendrës Historike të Prizrenit, në të cilin organizim është prezantuar edhe raporti i titulluar “Qendra Historike e Prizrenit, Zonë e (Pa)Mbrojtur”.
Panelistë të tryezës ishin: Hasan Hoti, drejtor i Institutit për Mbrojtjen e Monumenteve Kulturore në Prizren, Sadik Paqarizi, drejtor i Urbanizmit dhe Planifikimit Hapësinor në Komunën e Prizrenit dhe Vesel Hoxhaj, Kryetar i Këshillit të Trashëgimisë Kulturore të Prizrenit.
Diskutimi u zhvillua rreth respektimit të kritereve urbanistike në pjesë të ndryshme të qytetit të Prizrenit, me fokus në Qendrën Historike të Prizrenit. Panelistët filluan diskutimin me përshkrimin e përgjegjësive dhe aktiviteteve të tyre për ruajtjen e trashëgimisë kulturore.
Gjatë debatit u tha se mungon një bashkëpunim i mirëfilltë ndërmjet institucioneve lokale dhe qendrore. Hasan Hoti, nga Instituti për Mbrojtjen e Monumenteve në Prizren i shprehu shqetësimet që kanë të bëjnë me drejtoritë komunale duke thënë se jo gjithmonë ato e kërkojnë dhe presin pëlqimin/përgjegjen nga Instituti, për të bërë një intervenim në Qendrën Historike te Prizrenit.
Drejtori i Urbanizimit, Sadik Paçarizi u ankua se IMMH i vonon pëlqimet, si dhe nuk merr leje për punimet restauruese në Zonën Historike. Vesel Hoxhaj nga Këshilli për Trashëgimi Kulturore tha se mungon bashkëpunimi i duhur dhe se duhet punuar në këtë drejtim.
Në tryezë nga shumica e pjesëmarrësve u përmenden shembuj të transformimit të strukturës urbane të qytetit dhe degradimit që ka pësuar Qendra Historike gjatë dekadës së fundit, si rezultat i aktivitetit kaotik ndërtimor dhe u tha se sa më shpejtë duhet që të ndalet ky degradim ndaj objekteve me vlera historike kulturore. Gjithashtu u diskutua mos respektimi i ligjeve dhe planeve rregullative.
Nga muaji korrik 2013, “EC Ma Ndryshe” ka nisur zbatimin e projektit “Urbanizmi i Prizrenit nën vëzhgim të përhershëm”. Nevoja për mbikëqyrjen e zhvillimeve në sektorin e urbanizimit ka rrjedhë si pasojë e zhvillimeve të shumta negative gjatë periudhës së pasluftës dhe tranzicionit që janë manifestuar me degradimin urban dhe planifikimin e pa-balancuar hapësinor.
Projekti synon që të instaloj një sistem të monitorimit të përhershëm të aktivitetit shtetëror (dy nivelet e pushtetit dhe organet e drejtësisë) në fushën e menaxhimit dhe zhvillimit urban në qytetin e Prizrenit, me theks të veçantë në Qendrën Historike të tij, për të siguruar rend urbanistik./PrizrenPress.com/