Në kuadër të procesit të inventarizimit për Trashëgiminë Kulturore të paluajtshme në regjionin e Prizrenit, ekipi në përbërje të bashkëpunëtorëve profesional të Qendrës Rajonale për Trashëgimi Kulturore në Prizren, nga “Procesi i Inventarizimit” bazuar në politikat programore të miratuara nga Ministria e Kulturës Rinisë dhe Sporteve për vitin 2015 ka përfunduar fazën e parë të punës për Inventarizimin e objekteve të Trashëgimisë Kulturore për Komunën e Prizrenit.
Zyrtarët e QRTK-së, në Prizren kanë kryer punë në terren, duke vizituar 28 monumente të Trashëgimisë Kulturore për ta bërë dokumentimin e tyre ku janë plotësuar të dhënat tekstuale, fotografike, grafike, kadastrale në këto ndërtesa të Trashëgimisë Kulturore që gjenden në territorin e Komunës së Prizrenit.
Drejtori i Qendrës Rajonale për Trashëgimi Kulturore në Prizren, Samir Hoxha, thotë se gjatë këtij procesi të punës i cili konsiderohet tepër i rëndësishëm për dokumentimin e objekteve të Trashëgimisë Kulturore në regjionin e Prizrenit, për 28 monumente janë përgatitur, dosjet elektronike dhe dosjet fizike me përmbajtje:
a. Formulari i vlerësimit;
b. Referimi fotografik: Fotografitë e vjetra dhe aktuale të monumentit;
c. Referimi grafik: Plani i rilevimit i gjendjes aktuale;
d. Referimi bibliografik;
e. Referimi kadastral: Kopja e Planit dhe Lista poseduese;
f. Referimi tekstual: Raportet e hartuara rreth monumenteve të caktuara.
“Puna dhe angazhimi i Qendrës Rajonale për Trashëgimi Kulturore në Prizren, gjatë vitit 2015 do jetë e vazhdueshme, meçërast këtë vit planifikohet që në kuadër të politikave programore të MKRS-së, do të kemi një pasqyrim më të plotë të thesareve tona e të objekteve të Trashëgimisë Kulturore për regjionin e Prizrenit”, thotë Hoxha. /PrizrenPress.com/