Gjykata Themelore e Prizrenit, Departamenti i Përgjithshëm Penal ka bërë shpalljen e aktgjykimit dënues ndaj të akuzuarve me iniciale E.F., nga Prizreni për shkak të veprës penale kanosje dhe veprës penale sulm, i akuzuari me iniciale G.P. nga Prizreni për shkak të veprës penale sulm, i akuzuari me iniciale D.K. nga Prizreni për shkak të veprës penale kanosje, bëhet e ditur përmes një komunikate për media.
Të akuzuarin me iniciale E.F, gjykata e ka shpallur fajtor dhe e ka dënuar me dënimin unik me gjobë në shumën prej 900 (nëntëqind) euro.
“Sepse me datën 19.07.2019, rreth orës 12:00 në Prizren, saktësisht në parkingun e qendrës tregtare “Abi Qarshia”, i pandehuri me iniciale E.F. seriozisht e kanos të dëmtuarin me iniciale GJ.F. me qëllim frikësimit dhe shkaktimit të ankthit, se do të shkaktojë ndonjë të keqe, në atë mënyrë pasi që i dëmtuari në cilësinë e gazetarit TV Besa ishte duke incizuar aksionin e Inspektoratit Komunal të Ndërtimtarisë për rrënimin e një pjese të qendrës tregtare të lartcekur”, thuhet në komunikatë.
Tutje thuhet se në parkingun e qendrës tregtare “Abi Qarshia”, i pandehuri me iniciale E.F. i cili ishte djali i pronarit të qendrës tregtare “Abi Qarshia” me dashje e përdor forcën fizike ndaj personit tjetër, në atë mënyrë që derisa të dëmtuarit me iniciale GJ.F dhe G.Z në cilësinë e gazetarit TV Besa ishte duke incizuar aksionin e inspektoratit Komunal të Ndërtimtarisë për rrënimin e një pjese të qendrës tregtare të lartcekur, i pandehuri E.F. me qëllim të mos i lejoj të incizojnë të njëjtit në vendin e lartcekur ju afrohet të dëmtuarve duke i shtyrë me duar.
Të akuzuarin me iniciale G.P, gjykata e ka shpallur fajtor dhe e ka dënuar me dënimin me gjobë në shumën prej 400 (katërqind) euro.
Sepse me datën 19.07.2019, rreth orës 16:00 në Prizren, saktësisht në parkingun e qendrës tregtare “Abi Qarshia”, i pandehuri me iniciale G.P. i cili është menaxher në Qendrën Tregtare “Abi Qarshia” me dashje e përdor forcën fizike ndaj personit tjetër, në atë mënyrë pasi që i dëmtuari me iniciale N.XH., në cilësinë e gazetarit TV Prizreni ishte duke incizuar aksionin e Inspektoratit Komunal të Ndërtimtarisë për rrënimin e një pjese të qendrës tregtare të lartcekur, i pandehuri i afrohet të dëmtuarit fillimisht me dorë pengon incizimin nga ana e dëmtuarit e pastaj me dorën e djathtë e godet të dëmtuarin derisa ishte duke e mbajtur kamerën në duar, e krejt kjo me qëllim që i dëmtuari mos të incizoj.
Të akuzuarin me iniciale D.K., gjykata e ka shpallur fajtor dhe e ka dënuar me dënimin me gjobë në shumën prej 500 (pesëqind) euro.
Sepse me datën 19.07.2019, rreth orës 16:00 në Prizren, saktësisht në parkingun e qendrës tregtare “Abi Qarshia”, i pandehuri me iniciale D.K. seriozisht e kanos të dëmtuarin me iniciale N.XH., me qëllim frikësimi dhe shkaktimit të ankthit, se do ta privoj nga jeta, në atë mënyrë pasi që i dëmtuari në cilësinë e gazetarit TV Prizreni ishte duke incizuar aksionin e Inspektoratit Komunal të Ndërtimtarisë për rrënimin e një pjese të qendrës tregtare të lartcekur, i pandehuri i afrohet të dëmtuarit dhe e pengon të incizojë.