FIFA, organi më i lartë i futbollit në botë, ka publikuar renditjen më të fundit të kombëtareve, atë të datës 26 tetor 2023. Në bazë të saj, Shqipëria dhe Kosova, pas ecurisë së mirë në dritaren e fundit ndërkombëtare, kanë forcuar pozitat e tyre duke u renditur në vende më të mira nga sa ishin në renditjen e mëparshme.
Shqipëria, e cila kryeson grupin e saj në kualifikueset e Euro 2024 dhe pasi mundi Çekinë 3-0, dhe Bullgarinë 2-0 në miqësore, tashmë e shikon veten në vendin e 59 në renditjen e përgjithshme.
Më herët, kuqezinjtë ishin në vendin e 62, falë paraqitjeve të mira në barazimin 1-1 në Ceki dhe fitoren 2-0 me Poloninë në Tiranë.
Përsa i përketë renditjes së UEFA-s, Shqipëria mban vendin e 29 tashmë nga 55 federatat anëtare të organit drejtues të futbollit në Evropë.
Përparim ka bërë edhe Kombëtarja e Kosovës përsa i përketë renditjes. Dardanët kanë shkuar nga vendi i 111 në atë të 105. Kjo e ndikuar nga fitorja 0-3 në transfertën e Andorrës për kualifikueset e Euro 2024.
Kujtojmë se Kosova kishte arritur në vendin e 109 më herët, para se të zbriste në atë të 111 pas paraqitjeve zhgënjyese në dritaren ndërkombëtare të shtatorit ku erdhi humbja 2-0 me Rumaninë dhe barazimi 2-2 me Zvicrën në Prishtinë.
Ndërsa, në lidhje me renditjen e vendeve të UEFA-s, Kosova gjendet në vendin e 43 nga 55 federatat anëtare.
Në bazë të renditjes së FIFA-s, Argjentina qëndron përsëri në krye të saj. Kampionët në fuqi të Botës ndiqen nga Franca, Brazili, Anglia dhe Belgjika. Një renditje e cila nuk ka pasur ndryshim nga hera e fundit, ajo e datës 21 shtator 2023.
Portugalia ka bërë përparim duke u ngjitur në vendin e gjashtë, vend të cilin më herët e mbante Kroacia. Me kroatët tashmë që e shohin veten në vendin e 10.
Holanda e ka ruajtur të pandryshuar pozitën e saj në vendin e shtatë. Spanja është ngjitur në vendin e tetë nga pozicioni i 10 që ishte më herët. Ndërsa, Italia qëndron në vendin e nëntë, duke mos pasur asnjë ndryshim.
Pritësit e Euro 2024, Gjermania, kanë zbritur edhe më tej në renditje, duke qenë tashmë në vendin e 16 në Botë.
San Mrino vijon të jetë kombëtarja më e dobët në renditjen e FIFA-s, duke qëndruar në vendin e fundit ose atë të 207-të.
Renditja e radhës e FIFA-s pritet të zbulohet pas një muaji, kur të luhen ndeshjet ndërkombëtare të nëntorit.