Nga Jakup Krasniqi
Drejtuesit e shtetit dhe pretendentët e tij për të drejtuar shtetin, duhet ta adresojnë qartë e pa ekuivokë meritën e brezave që na sollën në këtë ditë. Nuk kam asnjë dyshim, se merita është e gjithë kombit, pasi i tërë kombi ka pranuar për shekuj jetën si të “gjarprit nën gur” për t’i mbrojtur këto troje. Sigurisht që kryemeritat u shkojnë atyre që ishin më me integritet, që kishin guximin e gatishmërinë për t’u përballur edhe me rreziqe të paparashikueshme.
Guximi e integriteti i ka shtyrë përpara proceset politike që kanë mbajtur të gjallë idealin e çlirimit e të bashkimit kombëtar, kjo ka ndodhur te cilido komb në botë. Por nuk ka ndodhur në asnjë vend të botës që meritat t’u adresohen atyre që nuk kanë pasur guxim e integritet për të luftuar për liri e pavarësi?! Çështjet, qofshin historike a politike, duhet të adresohen saktë, mbi bazën e fakteve dhe të veprave politike e jo të dëshirave!
Shumë breza luftuam dhe u flijuan, u ndoqën dhe u përndoqën për liri e çlirim dhe të gjithë së bashku e përgatitën ambientin dhe terrenin për brezin e Adem Legjendarit, për brezin e UÇK-së, që ta jetësojë idealin e brezave për liri e çlirim. Pra Ushtria Çlirimtare e Kosovës dhe Komandanti i saj, Adem Legjendari, janë: “buka, gjaku dhe jeta” e shtetit të pavarur, sovran dhe demokratik të Kosovës.
Vargu i dëshmorëve të kombit është shumë i gjatë, është i të gjitha trojeve shqiptare, por balli i tyre ishte Adem Legjendari. Secili nga ne e di se Komandanti Legjendar Adem Jashari nuk e ka arritur çlirimin e Kosovës nga Serbia, nuk ka marrë asgjë për vete a familjen nga Kosova, por i ka dhënë shumëçka e gjithçka që kishte ai e familja e tij fisnike.
Adem Jashari nuk e jetoi lirinë në Kosovën e lirë, pse preferoi vdekjen për liri e jo jetën në robëri. Rënia e tij dhe e Jasharëve Legjendarë, mobilizoi të gjithë kombin shqiptar për çlirimin e Kosovës. Liria e pavarësia jonë nuk do të vinin pa flijimin e tij e të familjes së tij! Vetëm ajo rënie e madhe e mobilizoi kombin në luftën çlirimtare! Të tjerët kishte kohë që e kishin demobilizuar popullin e Kosovës, me frikën e luftës.
Të ligj e antinjerëz janë të gjithë ata që përpiqen ta adresojnë kudo tjetër, vetëm jo aty ku është, liria e pavarësia e Kosovës! Më të ligj se mohësit, janë vetëm ata që u përpoqën dhe arritën te një masë e njerëzve, që dashurinë e tyre për Legjendarin, ta kthejnë në dashuri për xhepin, barkun a një vend pune?! Kjo është tepër e dhembshme, madje e tmerrshme, sidomos për ata luftëtarë të orëve të para që shkelën mbi idealin e dinjitetin e tyre, të dëshmuar në një kohë tepër të vështirë e të mohuar në liri?!
Këtë fakt, faktin e mobilizimit të kombit për çlirim, nuk e kupton shumëkush, kur Adem Jashari më të drejtë krahasohet me personalitete legjendare të kombit, por ata nuk e kanë parasysh ose nuk duan ta kenë parasysh të gjithë dimensionin e madhështisë së Komandantit Legjendar, Adem Jashari, dhe të familjes së tij.
Pse po e them ketë?
Po e them këtë, se pa konsistencën e konsekuencën e Adem Jasharit për të formuar formacionet e para të UÇK-së, pa vazhdimin e rritjen e ushtarëve të UÇK-së, pa gatishmërinë për të luftuar e rënë për liri, nuk do të sigurohej vazhdimësia e Ushtrisë Çlirimtare të Kosovës. Ta themi shkurt, Adem Jashari me jetën dhe veprën e tij të pakontestueshme, është themeluesi i UÇK-së, rreth të cilit janë bashkuar të gjitha bërthamat e UÇK-së anekënd Kosovës. Rasti i Adem Jasharit, rasti i Jasharëve Legjendarë është rasti më unikat në botë, i cili jo me jetën e tij, por me rënien e tij e të familjes, mobilizoi kombin shqiptar në luftën për liri. Nuk e di, nëse ka në botë, qoftë edhe një rast të tillë!
Në këtë 18-vjetor, kurrë më shumë se sot, në 17 vitet e lirisë e tetë vitet e pavarësisë, nuk kemi pasur nevojë më të madhe për t’iu drejtuar liribërësve për t’i falënderuar për lirinë që e kemi dhe kërkuar falje deri në përulje për mëkatet që po i bëjnë qeveritarët dhe njerëzit e paguar nga ta! Qeveritarë që mandatin na e paskan marrë (si e kanë marrë nuk ka rëndësi), nga qytetarët?!
Të përfundojmë: E sotmja qoftë e mjerë siç po shfaqet këto ditë, qoftë edhe e pashpresë për momentin, në asnjë formë a mënyrë nuk mund ta zbehë e as shëmtojë lirinë e pavarësinë e republikës, nuk mund ta zvetënojë asnjë formë e meskinitetit njerëzor, madhështinë e veprës së Dëshmorëve të Kombit – Shtetin e Pavarur, Sovran e Demokratik!
Shënim
Fjalori shqip-shqip në internet, për fjalën legjendë/ar jep këtë shpjegim: që është kthyer në legjendë, që është si në legjendë, që është karakteristikë për legjendat; që bën trimëri të pashoqe, që mbetet i pavdekshëm, madhështor, i jashtëzakonshëm. Hero legjendar. Figurë legjendare. Luftë (epope) legjendare. Trimëri (qëndresë, vepër) legjendare. Forcë legjendare. (Fjalori shqip-shqip