Kandidati i Lëvizjes Vetëvendosje! për kryetar të Prizrenit, Arbër Rexhaj, ka vizituar sot Asosacionin i Veteranëve të Ushtrisë Çlirimtare të Kosovës në Prizren.
Rexhaj, tha se vlerat e Ushtrisë Çlirimtare e Kosovës duhet të jenë të pa-partishme, ngase ajo i takon të gjithë qytetarëve. “Lufta jonë ka qenë e drejtë, sepse e kanë bërë qytetarët e këtij vendi. Ushtria Çlirimtare e Kosovës i takon të gjithë qytetarëve të Kosovës. Pushteti aktual në vazhdimësi është përpjektur që t’i ngjyrosë me ngjyra partiake organizatat e dalura nga lufta. Është i domosdoshëm departitizimi i tyre. Shoqatat e dalura nga lufta duhet të jenë të qytetarëve dhe të mbrojnë vlerat kombëtare dhe assesi partitë politike dhe interesat e tyre. Andaj, ato urgjentisht duhet ta kenë neutralitetin partiak”, tha Rexhaj.
Kryetari i veteranëve të UÇK-së, Selim Krasniqi, informoi Rexhajn për gjendjen e rëndë të veteranëve të ish-ushtarëve të Ushtrisë Çlirimtare të Kosovës, të cilët po përballen me kushte të rënda ekonomike. “Ata të cilët kanë dhënë për Kosovën duhet të kenë më shumë mbështetje institucionale”, tha Krasniqi. /PrizrenPress.com/