Marcelo Bielsa ka rënë dakord të bëhet trajner i kombëtares së Uruguait, tha të enjten një ekzekutiv i shoqatës së futbollit të vendit.
Jorge Casales, një anëtar i komitetit ekzekutiv të shoqatës së futbollit të Uruguait, tha për “Associated Press” se ish-trajneri i Leeds do të nënshkruajë një kontratë deri në Kupën e Botës 2026.
“E vetmja gjë që mungon është nënshkrimi”, tha Casales për marrëveshjen 39-mujore. Brenda ditësh pritet në Montevideo 67-vjeçari Bielsa.
Ndeshjet e para të Bielsa-s në detyrë ka të ngjarë të jenë në qershor, kur Uruguai është planifikuar të luajë miqësore kundër Nikaraguas dhe Kubës. Kualifikimet e Botërorit të Amerikës së Jugut do të fillojnë në shtator.
“Ne po sjellim dikë që e dimë se do të na lërë një trashëgimi që shkon përtej 90 minutave të një ndeshjeje”, tha Casales. Negociatat me Bielsa zgjatën “tre muaj”, tregoi ai.
Uruguai u eliminua në fazën e grupeve të Kupës së Botës në Katar vitin e kaluar, në një fushatë zhgënjyese për skuadrën e Amerikës së Jugut. Bielsa ishte trajner i Argjentinës nga viti 1998 deri në 2004. Ai e pa ekipin e tij të eliminuar në fazën e grupeve të Kupës së Botës 2002 dhe më pas fitoi medaljen e artë në Lojërat Olimpike të Athinës 2004. Ai u largua nga puna për arsye personale.
Bielsa gjithashtu ishte trajner i Kilit midis 2007 dhe 2011.
Argjentinasi kishte punuar edhe te Espanyol, Athletic Bilbao, Marseille dhe Lille. Ai ka mbetur pa punë që nga shkurti i vitit 2022 kur u pushua nga Leeds.
Albanian Post