Reshjet e mëdha të borës dhe shiut, dhe lagështia e madhe e krijuar në tokë, ka bërë që të shembet një pjesë e dheut dhe gurëve, në afërsi të shkollës së re, në fshatin Shkozë të Malishevës, por për fatin e mirë, kjo shkollë ende nuk është hapur për mësim dhe dëmet e shkaktuar, janë të vogla dhe vetëm materiale.
Për ta vëzhguar këtë rrëshqitje të dheut, sot në fshatin Shkozë, kanë qëndruar edhe Kryetari i Komunës së Malishevës, Ragip Begaj dhe drejtori i arsimit, Blerim Thaçi, ku kanë shprehur shqetësimin e tyre, dhe kanë kërkuar që të bëhet kujdes i shtuar nga ana e drejtorisë së shkollës dhe mësimdhënësve, që mos ti lejojnë nxënësit, të luajnë në afërsi të pjesës ku mund të ketë përsëri shembje dheu.
“Kjo gjendje nuk është e mirë dhe rreziku i rrëshqitjes së dheut, më ka shtyrë, që të mos lejoj hapjen e shkollës, deri në zgjidhjen e problemit, për rregullimin e pjesës mbrojtëse, por kjo aktualisht nuk mund të bëhet, për shkak të kushteve atmosferike dhe konfiguracionit të terrenit”, tha Begaj.
“Këtë projekt të ndërtimit të shkollës e kemi gjetur kështu, por pas ndërtimit, nuk kam lejuar hapjen e saj, pasi nuk ka siguri, pa u ndërtuar edhe muri mbrojtës nga rrëshqitja e dheut”, deklaroi Begaj, i cili edhe më herët, kishte kërkuar rregullimin e problemit, por për shkak të stinës së dimrit, një gjë e tillë nuk ka mundur të rregullohet deri më tani.
Rrëshqitja e dheut ka dëmtuar pjesërisht një dritare të objektit të shkollës, por pa dëme tjera./PrizrenPress.com/