Një dëmtues i pyjeve ka sulmuar fizikisht rojtarin e Njësisë së Pyjeve në Prizren. Sulmi ka ndodhur në vendin e quajtur “Koretniku”.
Përgjegjësi i Njësisë së Pyjeve në Prizren, Izet Osmanaj tha se sulmuesi i rojtarit është recidivist i dëmtimit të pyjeve.
“Rojtari kur është sulmuar ka qenë në vendin e tij të punës”, tregon Osmanaj për “PrizrenPress”.
Sipas tij, rojtari pasi e ka zënë sulmuesin duke dëmtuar pyllin, nga ai ka kërkuar të gjitha dokumentacionet e identiteti të tij.
”Rojtari fillimisht ia ka kërkuar shënimet e tij, mirëpo, dëmtuesi përveç që nuk ia ka dhënë shënimet e tij, ka filluar ta sulmojë fizikisht”.
Osmanaj tregon se për shkak të lëndimeve që ka marrë, rojtari është dërguar për trajtim mjekësor në Qendrën Spitalore në Prizren. ”Rojtari ka marrë disa lëndime trupore, prandaj është dërguar për trajtim mjekësor në Spitalin e Prizrenit”. /PrizrenPress.com/