Nuk është vetëm Aeroporti Ndërkombëtar i Prishtinës që në mbishkrimin zyrtar kryeqytetin e Kosovës e shkruan “Pristina”. Kështu e ka shkruar në tabelën e njoftimit të lokacioneve ku do të ndalet edhe autobusi i kompanisë “Erhan Tours”, që niset nga Prizreni për në Beograd. Shoferi dhe konduktori nuk dëshirojnë të flasin për këtë punë.
“Nuk kemi punë me gazeta. Na duhet punë. Punë, vetëm punë”, theksonte konduktori shtatgjatë para autobusit, jashtë stacionit të autobusëve të enjtën mbrëma në Prizren.
Ai bënte presion që të mos u kërkohej udhëtarëve të tregonin arsyet e shkuarjes në kryeqytetin serb. Numri i pasagjerëve nuk ishte fort i madh në orën shtatë e gjysmë të mbrëmjes, shkruan Koha Ditore.
Humbja e besmit te mjekët kosovarë
Albani nga rrethi i Prizrenit thotë se është detyryar të vinte nga Austria në Kosovë për t’i ndihmuar familjes që ka një anëtar të sëmurë me një sëmundje të rëndë. Albani, i cili kërkon të mos i publikohet identiteti i vërtetë, thotë se nuk ka guxuar t’ua besojë mjekëve kosovarë trajtimin e anëtarës së familjes së tij. Nuk jem shumë detaje derisa e afërmja e tij futet në autobus.
“Nuk ka mbetur me iu besu këtyre këtu. Përditë nëpër gazeta po shkruhet për skandale të mjekëve që luajnë me jetë të njerëzve të sëmurë”, thotë i frustruar Albani, teksa vendos valigjet në bagazhin e autobusit.
Qeveria e kryeministrit Hashim Thaçi nuk e ka aprovuar muajin e kaluar kërkesën e ministrit të Shëndetësisë, Ferid Agani, për rritjen e buxhetit të Shëndetësisë për angazhimin e 120 specialistëve, të cilët pas protestave të vazhdueshme kishin marrë zotimin e ministrit për punësimin e tyre në vitin e ardhshëm./Koha Ditore/