Paraqitja impresive e sulmuesit të Liverpoolit, Mohamed Salah, në fitoren 5:2 ndaj Romës, të martën, e ka çuar skuadrën e tij në prag të kualifikimit në finale të Ligës së Kampionëve dhe njëkohësisht ai është duke kërcënuar seriozisht dominimin e Lionel Messit dhe Cristiano Ronaldos për çmimin “Topi i artë”.
Sulmuesi egjiptian shënoi dy gola të shkëlqyer në pjesën e parë kundër ish-skuadrës së tij për të ndihmuar Liverpoolin drejt një fitoreje të thellë në “Anfield Road” në ndeshjen e parë gjysmëfinale. Ai asistoi edhe dy gola tjerë në pjesën e dytë për t’i vënë kapak paraqitjes së madhe të tij.
Rëndësia e Salahut u demonstrua më tepër me faktin se Roma shënoi dy gola, që i japin shpresë për përmbysje të rezultatit, në momentin kur Salah ishte zëvendësuar.
Sulmuesi egjiptian ka arritur në shifrën e 43 golave në të gjitha garat këtë stinor, duke qenë një gol para Cristiano Ronaldos së Real Madridit dhe dy para Lionel Messit të Barcelonës.