Heroi i Kosovës, i rënë në betejën e Koshares, Sali Çekaj, në fjalimin e mbajtur në Kuvendin e tretë zgjedhor të Lidhjes Demokratike të Kosovës, dega në Gjermani në vitet ‘90-ta, kritikonte Bujar Bukoshin e Isa Mustafën.
Në një video-incizim të postuar rishtazi në Youtube, shihet Sali Çekaj duke kritikuar veprimet e kryeministrit të Qeverisë së Kosovës në ekzil, Bujar Bukoshit dhe Isa Mustafës, ministër i atëhershëm i financave i Qeverisë së Kosovës në ekzil, në lidhje me vendimin për ndaljen e mjeteve financiare për presidentin e Kosovës, Ibrahim Rugova.
“Skandali më drastik është ndalja e mjeteve për presidencën dhe se duhet të theksoj edhe njëherë anomalitë me të cilat ne po ballafaqohemi: në të njëjtën kohë kërkohet ndihmë për presidencën, e në të njëjtën kohë në Kosovë para bashkëkombasve tanë thuhet se nuk ka bllokim dhe që të dy palët, shumë e pak nga i njëjti burim financohen”, thotë Çekaj në këtë videoincizim. Dhe në të njëjtën kohë i bënë një lutje që në Kuvendin e LDK-së të futen ndryshimet statutare – Instituti i Përgjegjësisë
Çekaj ishte njëri nder themeluesit e degës së LDK-së në Deçan, ndërsa me t’u larguar nga Kosova, aktivitetin e tij politik e vazhdon në Gjermani, ku u zgjodh nënkryetar i Degës së LDK-së në Gjermani. Çekaj ishte një prej organizatorëve më të mëdhenj të shqiptarëve për të ndihmuar materialisht e politikisht pavarësinë e Kosovës. Po ashtu, punoi dhe organizoi lëvizjen çlirimtare të Kosovës, duke vepruar në Kosovë, Shqipëri e në Evropë.
Sali Çekaj u vra më 19 prill 1999 në Betejën e Koshares. Presidenti i ndjerë i Kosovës, Ibrahim Rugova, më 19 prill 2005, e dekoroi dëshmorin e kombit Sali Çekaj me Urdhrin Hero i Kosovës, për meritat e tij për lirinë dhe pavarësinë e Kosovës.
http://youtu.be/FVXHbDHB4Xo