Të enjten u mbajt mbledhja e radhës e Kuvendit të Prizrenit, ku u shqyrtuan dhe miratuan një sërë pikash të rendit të ditës.
Pjesa më e madhe e kohës së seancës u kushtua pyetjeve të kuvendarëve dhe përgjigjeve të drejtuesve komunalë. Një nga çështjet më të diskutuara ishte menaxhimi i mbeturinave.
Kuvendarja e Lëvizjes Vetëvendosje, Dafina Alishani, kërkoi një sqarim konkret nga drejtori i Shërbimeve Publike, Çelë Lamaj, lidhur me një deklaratë të tij në këtë mbledhje. Në përgjigjen e tij, drejtori Lamaj theksoi nevojën që qytetarët të mos hedhin mbeturina në vende të ndaluara dhe kërkoi që organet kompetente të përmbushin përgjegjësitë e tyre.
Pas diskutimit për këtë çështje, Kuvendi votoi për propozimin për formimin e Komisionit Vlerësues prej pesë anëtarësh. Gjithashtu, pas një debati të gjatë, me 15 vota për, 8 kundër dhe 6 abstenime, u miratua propozim-vendimi për dhënien e pronës komunale në shfrytëzim afatshkurtër organizatave të shoqërisë civile në lagjen “Bazhdarhane”. Kuvendi vazhdoi më pas me pikat e tjera të rendit të ditës. TV Prizreni
