Në ditën e dytë të Seminarit Ndërkombëtar për Gjuhë, Letërsi dhe Kulturë Shqiptare, është shënuar 40-vjetori i këtij institucioni. Me këtë rast të gjithë ish-drejtorët e Seminarit, janë nderuar me mirënjohje nga dekani i Fakultetit Filologjik. Njëri nga ta, akademiku Rexhep Ismajli, ka vlerësuar se Seminari gjatë viteve të ‘70-a dhe ‘80-a, ka thyer blloqet politike e ideologjike, duke mbledhur albanologë nga e gjithë bota
Seminari Ndërkombëtar për Gjuhën, Letërsinë dhe Kulturën Shqiptare është themeluar në vitin 1974 pranë Fakultetit të Filologjisë (atëherë: Fakulteti Filozofik) të Universitetit të Prishtinës. Ky Seminar organizohet për studentë e studiues që merren me probleme të gjuhës, të letërsisë e të kulturës shqiptare, po edhe me albanologjinë përgjithësisht. Seminari ka zhvilluar gjithsej tridhjetë e dy sesione. Në vitin 1991 është ndërprerë veprimtaria e tij nga organet e dhunshme serbe.
Në vitet 1995 e 1996 sesionet e këtij Seminari u mbajtën në Tiranë në bashkëpunim me Institutin e Gjuhësisë e të Letërsisë të Akademisë së Shkencave të Shqipërisë. Nga viti 2000 Seminari zhvillohet sërish në Prishtinë. Sesionet 19 dhe 20 (2000-2001) janë organizuar në bashkëpunim me Institutin e Gjuhësisë dhe të Letërsisë të Akademisë së Shkencave të Shqipërisë. Sivjet Seminari është duke u mbajtur për herë të 33-të. Por krejt këto vite, e karakterizojnë këtë ngjarje me histori të ndryshme e vështirësi të shumta. Pikërisht për shkak të tyre, të martën, dekani i Fakultetit Filologjik të UP-së, Sedat Kuqi, ka ndarë mirënjohje për ish-drejtorët e Seminarit, atyre që janë gjallë dhe atyre tashmë që nuk janë në mesin tonë.
“Meritat e profesorëve, por edhe të themeluesve dhe institucioneve tjera, nga i pari deri tek i fundit, kanë kontribuuar për ekzistimin e këtij Seminari”, është shprehur Kuqi. Të parit që ia ka ndarë mirënjohjen, ka qenë akademik Idriz Ajeti, e pas tij është nderuar ish-drejtori Zejnullah Rrahmani, por i cili nuk ishte prezent.
Me mirënjohje është nderuar edhe Bahri Beci, ish-drejtor i Seminarit, derisa ky i fundit është mbajtur në Shqipëri. Mirënjohje postmortum i është ndarë ish-drejtori Fadil Raka, të cilën e ka pranuar djali i tij. Me mirënjohje është nderuar edhe profesor Imri Badallaj, Imri Matoshi e Rexhep Ismajli. Ky i fundit ka folur në emër të të gjithë ish-drejtorëve. Ismajli tha se nuk e kishte menduar asnjëherë historinë kaq të gjatë të Seminarit, pasi para luftës së fundit në Kosovë, jeta sipas tij ka qenë e paqëndrueshme.