Futbollisti i kosovar i përfaqësueses zvicerane, Xherdan Shaqiri ka thënë se momentalisht është i përqendruar tek përfaqësuesja e Zvicrës dhe Kampionati Evropian.
I pranishëm në hapjen e dyqanit të “Nike Store” në Zvicër, Shaqiri tha se ai luan me shumë zemër për Zvicrën. Ndërkaq, është shprehur i lumtur për inkuadrimin e Kosovës në UEFA dhe FIFA.
“Unë kam qenë shumë i lumtur që Kosova është pranuar në UEFA dhe FIFA. Por, unë luaj me shumë zemër për Zvicrën, jam plotësisht i përqendruar të bëjmë një Kampionat Europian shumë të mirë. Unë jam lojtar i Zvicrës, jap gjithçka për Zvicrën. Kjo është e vërteta dhe nuk ka asgjë për të diskutuar”, ka thënë Shaqiri, njofton Blick.
Shaqiri është i lindur në fshatin Zhegër të Gjilanit, derisa ishte shpërngulur së bashku me familjen drejt Zvicrës në moshën 1-vjeçare. Ai ka zhvilluar 51 ndeshje me përfaqësuesen zvicerane duke shënuar 17 gola.