Mosakreditimi i disa programeve në Fakultetin e Edukimit, në Universitetin e Prishtinës, Hasan Prishtina, i ka lënë në një situatë të vështirë studentët që janë regjistruar në vitet 2011/2012 dhe 2012/2013.Studentët e këtyre programeve: Gjuhë dhe Letërsi Shqipe (BA); Gjuhë dhe Letërsi Angleze (BA); Fizikë – Kimi (BA); Biologii – Kimi (BA); Matematikë – Informatikë (BA); Teknologji- Informatikë (BA); Histori – Edukatë Qytetare (BA); Gjeografi – Edukatë Qytetare (BA), janë ata që nuk janë akredituar.
Për këtë, Unioni i Studentëve Pro Evropian, ka kërkuar nga organet përgjegjëse për akreditimin e këtyre programeve duke u shkruar se studentët janë në situatë të vështirë, duke mos e ditur se çfarë do të bëhet me fatin e tyre të studimeve dhe punën që kanë realizuar tashmë që dy vite përkatësisht tri vite.
“Në bazë të gjendjes aktuale, diplomat e studentëve të regjistruar në këtë periudhë, nuk mund të jenë valide, për shkak të mos akreditimit të këtyre drejtimeve, dhe e tërë kjo ka ndodhur pa dijeninë e studentëve të cilët mendojmë se nuk duhet të pësojnë tash k ur kanë kaluar 2 vite të studimeve përkatësisht 3, por të bëhet akreditimi i këtyre drejtimeve dhe të rregullohet statusi i këtyre studentëve të cilët më së paku janë fajtorë për këto manipulime që kanë ndodhur”, thuhet në kërkesën e USP-së.
Ata këtë kërkesë u kanë dërguar Ministrisë së Arsimit, Shkencës dhe Teknologjisë, Rektoratit të Universitetit të Prishtinës “Hasan Prishtina”, Agjencisë së Akreditimit të Kosovës dhe Dekanatit të Fakultetit të Edukimit të UP-së.
“Ne si Union i Studentëve Pro Evropian (USPE) kërkojmë nga ju si institucione përgjegjëse që të shqyrtoni dhe të zgjidhni këtë çështje shumë të rëndësishme, dhe të rregullohet gjendje e cila është krijuar në Fakultetin e Edukimit, veçanërisht për studentët e këtyre programeve”, shkruan në kërkesën e USPE-së.