Shoqata Humanitare “Pashtriku” në Prizren, për dy vjet ka arritur t’i ndërtojë 12 shtëpi për familjet skamnore. Kryetari i “Pashtrikut”, Muharrem Dina tha se aktualisht janë edhe dy shtëpi në fazën përfundimtare të ndërtimit.
Për ta pasqyruar këtë aktivitet, kjo shoqatë ka organizuar ekspozitën e fotografive nga aktiviteti i ndërtimit të shtëpive në të gjitha mjediset e qyteteve të Rajonit të Prizrenit. Dina falënderoi të gjithë ata që e kanë ndihmuar Shoqatën “Pashtriku”.
Kryetari i Komunës Ramadan Muja tha ndërkaq se Komuna e Prizrenit do të vazhdojë me përkushtim të ndihmojë rastet e këtilla si dhe të ndihmojë shoqatat.
Me ndihmën e shoqatave dhe institucioneve Muja shprehu besimin se do të zgjidhet problemi i banimit për familjet që kanë nevojë për strehë.
Njëri nga anëtarët e Shoqatës “Pashtriku”, Fetah Bekolli tha se të gjithë ata që kanë mundësi dhe ndihmojnë, do ta shtojnë jo vetëm respektin te njerëzit por edhe pasurinë e tyre.
Bekolli e ka vlerësuar kryetarin e Organizatës “Pashtriku” si një njeri të palodhshëm në aktivitete për çështjen kombëtare dhe aktivitetin humanitar për të iu dal në ndihmë njerëzve në nevojë./TVO/