Kuvendi i Kosovës këtë të enjte do të ketë reprizë të situatës që ndodhi në 2011 ku qeveria e Kosovës nëpërmjet buxhetit tentoi në mënyrë të kundërligjshme të privatizonte PTK-në. Kështu vlerëson Shoqëria Civile për të cilët veprimet e qeverisë po bëhen në kundërshtim me ligjin e ndërmarrjeve publike. Madje për ta kuvendi do të duhej të ndjehej i turpëruar dhe nuk do të duhej të pranonte një diskutim të tillë.
Driton Selmanaj nga KDI ju bën thirrje publikisht të gjithë deputetëve të kuvendit që t’i thërrasin ndërgjegjes dhe të mundohen të arrijnë një konsensus për të ndaluar si të tillë këtë privatizim.
“Nëse kuvendi i Kosovës dhe qeveria e Kosovës duhet të jenë shembull se si mbrohet ligjshmëria në vend, e kanë rastin të dëshmojnë tani. Unë mendoj së këto institucione nuk duhet të binë pre e programeve dhe interesave të ngushta të ndonjë subjekti politik në dëm të kushtetueshmërisë së vendit. Nëse kuvendi i Kosovës do të ishte shembull për vendime të jashtëligjshme atëherë çfarë do të ishte mesazhi për institucionet dhe shoqërine në përgjithësi”, tha Selmanaj për KTV-në.
Ndërkohë për Avni Zogianin nga Organizata Çohu, kjo është lojë që po vazhdon moti dhe një arenë ku po përplasen forcat e ekzekutivit me kuvendin.
“Mua më vjen turp kur e shoh që për të 4-5 herë qeveria po mundohet të bëjë prapë të njejtën turpërim të kuvendit duke provuar që ta detyrojë atë që në mënyrë joligjorë t’a kalojë një dokumentë siç është privatizimi”, tha Zogiani.
Për Zogianin problem nuk është vetëm privatizimi i PTK-së por edhe nënshtrimi i plotë i kuvendit kur pritet shpejt në kuvend të kalojnë gjëra të papranueshme sikurse ndryshimet kushtetuese që lidhen direkt me negociatat me Serbinë.