Nga shtëpia botuese “Buzuku” në Prishtinë thonë se ata nuk kishin marrë asnjëherë ftesë për të qenë pjesë e panairit, prandaj si pasojë nuk kanë qenë asnjëherë pjesëmarrës. “Jo, nuk jemi pjesëmarrës. Arsyeja kryesore është sepse nuk kemi pasur ftesë për të qenë prezent atje. Realisht ngjarjet e tilla zakonisht janë me ftesa, ne kemi edhe praktika nga vendet e tjera si Frankfurti, Tirana e gjithashtu edhe nga panairet që organizon Prishtina. Zakonisht organizimet e tilla bëjnë ftesa. Në këtë panair edhe ashtu nuk është se marrin pjesë kushedi se sa botues shqiptarë. Në Shkup përqendrohen në literaturën e tyre dhe nuk ju japin rëndësi të madh botuesve shqiptarë apo autorëve shqiptarë” thotë për KultPlus Besian Zeneli nga Buzuku.
Ka nisur me datë 8, ndërsa edhe për disa ditë në Arenën Metropolis në Shkup po qëndron i hapur Panairi i Librit 2014. I 26-ti me radhë, ky panair sivjet sjell mbi 70 botues, promovime librash e botime të reja nga trevat ballkanike.
Në stenda me çmime të panairit do të shiten librat nga produksioni më i ri botues në Maqedoni dhe botimet e përkthyera, zhanre të ndryshme, letërsi shkencore, enciklopedi dhe fjalorë, libra për fëmijë.
Megjithatë, duket se botuesit shqiptarë nuk kanë shfaqur interesim që shtëpitë e tyre botuese dhe prurjet e tyre të jenë të pranishme në këtë Panair Ndërkombëtar Libri.
Në këtë panair, numri i botuesve shqiptarë është simbolik. Arsyet për mos pjesëmarrje të botuesve shqiptarë janë nga më të ndryshmet.
“Në këtë panair marrin pjesë 5-6 shtëpi botuese shqiptare. Shtëpitë botuese nga Kosova nuk janë prezentë, kështu ka qenë edhe vitet e tjera. Mendoj se është një gjë shqetësuese sepse ky panair në Shkup duhet të jetë qendër ku takohen të gjitha shtëpitë botuese shqiptare dhe frekuenca e tyre të jetë sa më e madhe”, ka deklaruar Nehat Avziu, përfaqësues i shtëpisë botuese “Albas”.
Botuesit nga Kosova nuk ishin ftuar që të jenë pjesë e këtij panairi, edhe pse nga Organizatorët e Panairit të Shkupit dhe Shoqata e Botuesve dhe Librarive të Maqedonisë (SHBLM) është paralajmëruar pjesëmarrje edhe e botuesve të huaj nga Bullgaria, Shqipëria, Serbia (e prezantuar nga Biblioteka kombëtare), Italia dhe Suedia (nëpërmjet ambasadave të tyre në Shkup) dhe Hungaria (Instituti Balashi nga Budapesti dhe Lektorati për gjuhë hungareze pranë Fakultetit filologjik “Bllazhe Koneski”).
Nga shtëpia botuese “Buzuku” në Prishtinë thonë se ata nuk kishin marrë asnjëherë ftesë për të qenë pjesë e panairit, prandaj si pasojë nuk kanë qenë asnjëherë pjesëmarrës.
“Jo, nuk jemi pjesëmarrës. Arsyeja kryesore është sepse nuk kemi pasur ftesë për të qenë prezent atje. Realisht ngjarjet e tilla zakonisht janë me ftesa, ne kemi edhe praktika nga vendet e tjera si Frankfurti, Tirana e gjithashtu edhe nga panairet që organizon Prishtina. Zakonisht organizimet e tilla bëjnë ftesa. Në këtë panair edhe ashtu nuk është se marrin pjesë kushedi se sa botues shqiptarë. Në Shkup përqendrohen në literaturën e tyre dhe nuk ju japin rëndësi të madh botuesve shqiptarë apo autorëve shqiptarë” thotë për KultPlus Besian Zeneli nga Buzuku. Sipas tij, çmimet e larta nëpër panaire, mos respektimi i uljes së kostove të shitjes dhe trajtimi jo meritor i autorëve shqiptar po bënë që sidomos në këtë Panair vit për vit të ketë më pak prurje shqip. Ai thotë se me kushte të mira do të ishin pjesë e Panairit.
Të këtij mendimi janë edhe botuesit nga Shqipëria. “Pengesa e parë është dogana, e dyta është blerësi, a ka interes botuesi ta sjellë librin këtu nëse nuk i shitet. Problemi tjetër është edhe trajtimi, stendat tona janë në periferi, kurse ato të botuesve maqedonas janë në qendër dhe me lloj-lloj zbukurimesh dhe më të privilegjuara”, është shprehur Apostol Duka nga shtëpia botuese “Labova”.
Gjatë shtatë ditëve të manifestimit të Panarit do të ketë promovime të përditshme dhe lexim në Qendrën promovuese të galerisë në Arenën Metropolis.
Motoja panairit të sivjetmë është “Panairi i librit – panair për dashurinë ndaj fjalës së shkruar”.
Panairi hapet çdo ditë në ora 10 e mbyllet në orën 20, ndërsa çmimi për biletë është 30 dinarë dhe 20 dinarë për vizita në grupe.