Shkeljet në Drejtorinë e Arsimit në Rahovec nuk kanë të ndalur. Së fundi Inspektorati i Arsimit në Gjakovë, pas inspektimit të kryer në Rahovec, ka evidentuar katër mësimdhënës që janë punësuar pa konkurs dhe janë duke vazhduar punën në shkollat e mesme “Xhelal Hajda-Toni” dhe “Selajdin Mullaabazi–Mici”.
Për më keq, këta profesorë janë familjarë të drejtoreve komunal, siç është rasti i Neki Sylejmanit (vëllai i drejtorit të financave, Lulëzim Sylejmanit) dhe Shqipriana Oruqi (mbesa e drejtorit të arsimit, Behar Rama).
Në lidhje me rastet në fjalë, pas inspektimit të bërë, Inspektorati i Arsimit në Gjakovë fillimisht ka rekomanduar që të bëhet anulimi i vendimit për pranimin e këtyre profesorëve që janë pranuar pa konkurs, dhe më pas, pasi që rekomandimet nuk janë respektuar nga ana e DKA-së në Rahovec tash e dy muaj, Inspektorati i Arsimit në Gjakovë së fundi ka nxjerrë vendime për anulimin e vendimit për pranimin e këtyre mësimdhënësve. Për më keq Drejtoria e Arsimit në Rahovec nuk është duke respektuar as vendimet e Inspektoratit, andaj mbetet të shihet se cili do jetë veprimi i mëtejshëm i Inspektoratit.
Në ndërkohë, ndonëse rekomandimet dhe vendimet e inspektoratit nuk po respektohen, tash e shtatë muaj këta profesorë vazhdojnë të punojnë në shkolla, përderisa në anën tjetër ka mjaftë të kualifikuar e të pa punë, të cilët çdo ditë presin hapjen e ndonjë konkursi dhe mundësinë për t’u punësuar në profesion të tyre./RahovecPress/