Kritika ndaj vendimit të Ministrisë së Arsimit për regjistrim me automatizëm edhe të 1000 studentëve të kategorive të dala nga lufta nuk kanë të ndalur.
Këtë po e kundërshtojnë edhe organizatat studentore në UP.
Flamur Pireva nga organizata Studim, Kritikë, Veprim, është shprehur se me këtë vendim Ministria e Arsimit ka thyer Ligjin për Arsimin e Lartë, pasi po ndërhyn drejtpërsëdrejti në kompetencat e Universitetit të Prishtinës, raporton KTV.
Sipas Pirevës, çdo ndihmesë tjetër për fëmijët e kësaj kategorie do të ishte e mirëseardhur, por kjo formë që ata të futen pa ndonjë kriter në UP është jo e drejtë dhe joligjore.
Këshilli drejtues i Universitetit të Prishtinës pritet që të hënën të mbajë një takim, ku do të diskutohet rreth kësaj çështjeje.
Leon Malazogu, zv.kryesues i Këshillit Drejtues të UP-së, i ka thënë KTV-së nëpërmjet telefonit se për këtë temë kanë folur edhe më herët, për llojet e ndihmesave dhe lehtësive që do të mund të bëheshin për këtë kategori.
Por tash vendimi i ministrit të Arsimit, Ramë Buja, sipas tij, ishte i papritur. Zyrtarë të UP-së vazhdojnë të heshtin.
