Ministri i Punëve të Brendshme, Xhelal Sveçla ka bërë të ditur se dy javë pas sulmit terrorist në Banjskë, kanë vijuar me zbardhjen e fakteve që vërtetojnë lidhjen e drejtpërdrejt të Serbisë në organizimin dhe realizimin e këtij sulmi.
Sveçla ka bërë të ditur se në vendin e ngjarjes ku ka ndodhur sulmi, njësitet policore kanë gjetur dokumentin personal dhe veturën e Milorad Jevtic, gjë që dëshmon se ai ka qenë në njësitin që e ka sulmuar Policinë e Kosovës, e ku mbeti i vrarë rreshteri i Policisë së Kosovës, Afrim Bunjaku.
“Terroristi Milorad Jevtic njihet si një ndër bashkëpunëtorët më të afërt të Danilo Vuciq, djalit të presidentit serb Aleksandar Vuciq. Nga 5 vizitat e fundit të djalit të Vuciqit në Kosovë, 4 herë ata kanë qenë bashkë në të njëjtën veturë. Milorad Jevtic është identifikuar edhe si njëri ndër sulmuesit e ushtarëve të KFOR-it më 29 maj në Zveçan”, ka thënë ministri Sveçla.
Ai ka thënë se mbetet që organet e sigurisë dhe hetimet të zbulojnë se përveç Vuçiqit dhe strukturave të larta shtetërore serbe, a ka qenë edhe djali i tij në planifikimin dhe organizimin e sulmit terrorist në Banjskë të Zveçanit.