Zëvendëskryeministrja Edita Tahiri, ka thënë se pret bashkëpunim nga kryetarët e komunave serbe me institucionet e Republikës së Kosovës. Përndryshe, sipas saj, nëse ka të atillë që refuzojnë ligjet e Kosovës do të mbeten pa u përfshirë në organet legale komunale të saj.
Tahiri ka thënë për “Epokën e re” se kryetarët e komunave serbe që janë zgjedhur në zgjedhjet e fundit lokale, marrëveshja e Brukselit i obligon që të bashkëpunojnë me institucionet e Kosovës dhe t’u përmbahen ligjeve të Kosovës. Në këtë drejtim ajo ka thënë se konstituimi i organeve të reja komunale do të bëhet sipas ligjeve të Kosovës.
“Organet legale komunale në komunat me shumicë serbe ne veri të vendit, janë rezultat i zgjedhjeve lokale të 3 nëntorit, të mbajtura në përputhje me ligjet e Republikës së Kosovës, ashtu sikurse e konfirmon marrëveshja e Brukselit. Procedura e konstituimit të organeve të reja komunale do të bëhet sipas ligjeve të Kosovës, dhe këto organe komunale do të funksionojnë në kuadër të rendit Kushtetues të shtetit të Kosovës. Kosova ka aprovuar Ligjin për Amnisti për të krijuar politika të mirëbesimit për ata qytetarë serbë, të cilët në të kaluarën kanë bërë veprime ilegale. Mendoj se zgjedhjet lokale dhe Ligji për Amnisti kanë krijuar kushte për shuarjen e komunave ilegale dhe krijimin e komunave legale dhe integrimin e tyre në sistemin shtetëror të Kosovës”, është shprehur Tahiri.
Zëvendëskryeministrja Tahiri ka thënë se kryetarët serbë janë të vetëdijshëm se bashkëpunimi i tyre me institucionet shtetërore të Kosovës është obligim ligjor dhe demokratik. Tahiri ka thënë se, nëse ndonjë kryetar serb heziton t’i përmbahet këtij obligimi, do të mbetet i papërfshirë në organet legale komunale të Republikës së Kosovës.
“Të zgjedhurit në këto komuna janë të vetëdijshëm për këto ndryshime në realitetin politik të mbështetur nga marrëveshja e Brukselit, dhe bashkëpunimi i tyre është obligim ligjor dhe demokratik. Nëse do të këtë të tillë që refuzojnë zbatimin e ligjeve të Kosovës, do të mbeten pa u përfshirë në organet legale komunale të Republikës së Kosovës. Ndërsa Serbia, e cila është nënshkruese e marrëveshjes së Brukselit, do ta rrezikojë ardhmërinë evropiane”, ka thënë Tahiri.