Ambasada shqiptare në Uashington DC në bashkëpunim me komunitetin shqiptar atje ka themeluar një bibliotekë me libra shqip.
“Të lidhur shpirtërisht me Shqipërinë, megjithëse larg, shqiptarët duan të flasin sa më shumë gjuhën e tyre, t’ua mësojnë atë fëmijëve të tyre, të ruajnë, kultivojnë dhe përcjellin artin, kulturën dhe zakonet e pasura shqiptare”, thuhet në një njoftim për shtyp të ambasadës së Shqipërisë në Uashington DC.
Gjatë një fjalimi të shkurtër me rastin e përurimit, Ambasadorja Faber përshëndeti dhe falënderoi përzemërsisht të gjithë të pranishmit duke përfshirë edhe organizatorët dhe vullnetarët e këtij aktiviteti duke shprehur vullnetin e saj për të vazhduar bashkëpunimin me komunitetin shqiptar në DC dhe zonat përreth.
Komuniteti shqiptar bëri thirrje që të vazhdojnë të nxisin dhurimin e librave në gjuhën shqipe, gjë që do të ndihmojë në ngritjen dhe pasurimin e tirazhit të bibliotekës shqip pranë ambasadës.