Mbrojtësi francez, Samuel Umtiti, duket sikur çdo ditë e më shumë është duke u larguar nga Barcelona dhe po i afrohet një marrëveshjeje me Manchester United.
Barcelona i kishte premtuar se do t’i fillonte negociatat me qendër mbrojtësin në fillim të këtij viti, duke shpresuar që do të ftoheshin pak pretendimet e 24 vjeçarit, por sot ato vetëm sa edhe më shumë janë shtuar.
Në njërën anë, ekipi katallan nuk është i gatshëm t’i plotësojë kërkesën e Umtitit për trefishimin e pagës, kurse në anën tjetër Manchester United nuk e ka fare problem këtë gjë, pasi Jose Mourinho është duke e kërkuar që t’i bashkëngjis Eric Bailly, një partner në mbrojtje.
Blerja e fundit e United në atë repart, suedezi Victor Lindelof, ka dështuar të impresionojë, derisa Mourinho ende nuk është i bindur plotësisht nga paraqitjet e Chris Smalling dhe për këtë arsye në listë i ka dy lojtarë francez, Samuel Umtitin e Barcelonës dhe Raphael Varane të Real Madrid.
Përkundër se Samuel Umtiti ka kontratë me Barçën deri në vitin 2021, brenga e tyre është klauzola prej 52 milionë funteve e francezit, që me shumat e kohëve të sotshme, për një lojtarë si ai, llogaritet goxha e përballueshme.
Umtiti momentalisht paguhet 2.6 milionë funte në vit tek Barcelona, kurse Manchester United është duke i ofruar rritjen e kërkuar francezit, me pagë vjetore prej 8 milionë funteve, që është një rritje të cilën mbrojtësi 24 vjeçar nuk do e anashkalojë aq lehtë gjatë afatit kalimtarë të verës.
Madje së fundmi, gjatë grumbullimit me Francën, në një kuiz intervistë për një televizion francez, në pyetjen lidhur me të ardhmen e tij tek Man.United, Umtiti nuk ishte përgjigjur as po e as jo, por me opsionin se “nuk i dihet”. /Insporti.com