Gjykata Themelore e Prizrenit i ka shqiptuar masën e paraburgimit prej një muaji të pandehurit F.B., me dyshimin se ka kryer dhunë në familje.
Masa e paraburgimit do të jetë e vlefshme deri më 25 shkurt.
F.B. akuzohet se më 25 janar, në mënyrë të vazhdueshme i ka shkaktuar dhunë psikologjike dhe fizike bashkëshortes së tij, duke shkuar i dehur në shtëpi, duke e fyer dhe duke e kanosur. Bashkëshortja e tij ishte larguar nga shtëpia për 30 minuta, por me t’u kthyer kanë vazhduar kërcënimet e fyerjet, ndërsa ka ndërhyrë djali i çiftit dhe e ka larguar F.B. nga dhoma.
Po ashtu më 26 janar, F.B., thuhet se në mënyrë të vazhdueshme ka kërcënuar të birin dhe e ka kërcënuar edhe se do ta vrasë me thikë.
Gjyqtari i procedurës paraprake, ka vlerësuar se masa e paraburgimit është e nevojshme për zhvillimin normal dhe të rregull të procedurës penale.
