Kandidati i Partisë Demokratike të Kosovës (PDK) për kryetar të Rahovecit, Idriz Vehapi në një prononcim për Telegrafin ka deklaruar se beson se në garën e balotazhit, e cila do të mbahet më 1 dhjetor do të triumfojë njëjtë si në zgjedhjet e 3 nëntorit.
Sipas tij, koalicioni në mes Aleancës për Ardhmërinë e Kosovës (AAK) dhe Lidhjes Demokratike të Kosovës (LDK), për balotazh në Komunën e Rahovecit, “nuk është bërë në interes të qytetarit”.
“Ai koalicion është bërë për disa interesa tjera, dhe jo për interes të qytetarit…”, ka thënë ai për Telegrafin.
Vehapi ka shtuar se deri më tani disponimi i qytetarëve të Rahovecit është “që ta mbështesim alternativën të cilën e ka ofruar PDK-ja për këtë komunë, si alternativa më e mirë”.
Në garën e balotazhit në Rahovec do të ballafaqohen kandidati i PDK-së, Idriz Vehapi, i cili ka nga zgjedhjet e 3 nëntorit ka siguruar 39 për qind të votave, dhe ai i AAK-së, Smajl Latifi, i cili ka siguruar 32 për qind të votave.