Kreu i Kuvendit të Kosovës, Kadri Veseli, në emër të tij e të institucionit që drejton ka ngushëlluar familjen e miqtë e akademikut Engjëll Berishës, me rastin e ndarjes nga jeta të tij.
“Sapo mora lajmin për ndarjen nga jeta të profesorit të muzikologjisë dhe akademikut Engjëll Berisha. Në emër të Kuvendit të Republikës së Kosovës dhe në emrin tim personal, u shprehi ngushëllime familjes së profesor Berishës, Akademisë së Shkencave dhe Arteve të Kosovës, kolegëve të tij nga fusha e artit dhe jetës universitare”, ka shkruar Veseli në telegramin tij.
“Profesor Engjëlli ka dhënë një kontribut shumë të çmuar në fushën e muzikologjisë duke edukuar gjenerata të tëra studentësh dhe krijuesish. Akademik Engjëll Berisha mbetet një nga shembujt më të mirë të punës akademike në trashëgiminë tonë kulturore dhe universitare”, thuhet në mesazhin e Veselit.
Akademik Engjëll Berisha ka ndërruar jetë sot ndërsa do të varroset nesër në orën 14:00 në Prizren.