Kapiteni i Zvicrës, Granit Xhaka, është zgjedhur nga tifozët e këtij vendi si “futbollisti më i dobët”.
Një sondazh i publikuar nga gazeta Blick.ch tregon se 41 për qind e lexuesve mendojnë se Xhaka ishte më i dobëti në barazimin 1:1 kundër Kosovës.
Ai mori kritika të mëdha për paraqitjen.
“Xhaka ishte lojtari i 12-të për kosovarët”, shkruajtën disa nga lexuesit.
“Të paktën dy herë ai thjesht qëndroi në vend dhe i dha mundësi kundërshtarit, një paraqitje shumë e dobët”, ishin disa nga komentet e tjera.
Ndërkaq, 59 për qind e vlerësuan Ruben Vargasin, autorin e golit të Zvicrës si më i miri.
Kombëtarja e Zvicrës siguroi mbrëmë kualifikimin në Kampionatin Evropian “Euro 2024”, pas barazimit 1:1 me Kosovën.
“Helvetikëve” u mjaftoi një pikë për të prerë biletën për në Gjermani, teksa tani në xhiron e fundit mund të synojnë pozitën e parë në Grupin I, pasi do të takohen me liderët e grupit, Rumaninë.