SHBA-ja de fakto i ka shpallur luftë ISIS-it dhe tani duhet të shtrëngohet për mundësinë e bartjes së luftës nga militantët në Amerikë, kanë paralajmëruar disa ligjbërës dhe analistë
Teksa Shteti Islamik po fiton terren dhe po shton rekrutët e huaj për luftime, grupi xhihadist llogaritet i aftë për të kryer sulme edhe në tokën amerikane. Këtë alarm e kanë lëshuar këtë javë disa ligjbërës dhe analistë të mbrojtjes në Shtetet e Bashkuara, të cilët argumentojnë se vendi de fakto i ka shpallur luftë Shtetit Islamik duke kryer sulme ajrore kundër pozicioneve të ISIS-it, dhe tani duhet të shtrëngohet për mundësinë e bartjes së luftës nga militantët në Amerikë.
“Zotëri President, bëhuni i sinqertë për rrezikun që na kanoset”, ka thënë senatorja republikane nga Karolina Jugore, Lindsey Graham, në Fox News. “Ata po vijnë”, ka paralajmëruar Graham.
Vërejtja e senatores Graham ka ardhur pas asaj që është dukur të jetë kërcënim i një luftëtari të Shtetit Islamik për të “ngritur flamurin e Allahut në Shtëpinë e Bardhë”. Një foto e përhapur gjerësisht në internet ka shfaqur një mbështetës të ISIS-it duke bërë një foto me një flamur të grupit xhihadist përpara, dhe me Shtëpinë e Bardhë në prapavijë, duke sinjalizuar mbase se ISIS është para portës së Shtëpisë së Bardhë. Legjenda e fotografisë shumë të diskutuar, megjithëse të paverifikuar, thoshte “Ne jemi këtu”, dhe ishte shoqëruar me ikonën e një fytyre të buzëqeshur.
Ekziston, megjithatë, një dallim i madh ndërmjet aspiratave për të sulmuar Amerikën në tokën e saj dhe mundësisë për t’i realizuar aspiratat. A kanë luftëtarët e ISIS-it aftësi apo mjete më të përsosura se Al-Qaeda, e cila kërcënon që më shumë se një dekadë pas sulmeve të 11 Shtatorit me një sulm tjetër të madh në tokën amerikane, por e cila kurrë nuk ka arritur ta realizojë atë?
“Këta njerëz (të ISIS-it, v.j.) janë të përgatitur për të luftuar, dhe ata i janë nënshtruar trajnimeve të rëndësishme në Siri dhe në Irak për të gjitha llojet e taktikave dhe teknikave, përfshirë krijimin e bombave”, thotë Samuel Brannen, pjesëtar i Programit të Sigurisë Ndërkombëtare në Qendrën për Studime Strategjike dhe Ndërkombëtare. “Ata i kanë duart e përlyera me gjak – nuk janë tipa që kanë lexuar në internet”, shton ai. “Kjo është diçka që ata tashmë kanë bërë – kanë shtënë me armë ndaj njerëzve. S’bëhet fjalë për posedim të aftësive të reja, por të aftësive të praktikuara”.
Për më tepër, gjithnjë e më shumë luftëtarë të ISIS-it tani janë perëndimorë, kanë paralajmëruar senatorja nga Kalifornia, Dianne Feinstein, dhe disa senatorë të tjerë amerikanë. “Ata nuk po aplikojnë për viza për në SHBA”, thotë Brannen. “Ata vetëm po i tregojnë pasaportat e tyre”.