Zëvendëskomandanti i Policisë së Kosovës në Dragash, Eljam Seferi, i cili akuzohej për keqpërdorim të pozitës zyrtare, gjatë zbatimit të një urdhërarresti, të premten, është liruar nga akuza.
Aktgjykimin e Gjykatës Themelore në Prizren, ka lexuar kryetari i trupit gjykues, Artan Sejrani, i cili ka deklaruar se i akuzuari Seferi lirohet nga akuza për keqpërdorim të pozitës dhe autoritetit zyrtar, sepse gjatë shqyrtimit gjyqësor nuk është arritur të provohet se i njëjti ka kryer një vepër të tillë penale.
Ndryshe, Prokuroria Themelore në Prizren e akuzonte Eljami Seferin se gjatë zbatimit të një urdhër-arresti të lëshuar nga Gjykata Themelore në Prizren, nuk i ka përmbushur detyrat e tij zyrtare, me qëllim që t’i shkaktoj dobi personit tjetër.
Sipas aktakuzës, Eljam Seferi, më 1 qershor 2017, së bashku me zyrtarë tjerë policor, ka shkuar në shtëpinë e Mexhait Qerimit në fshatin Bresanë të Komunës së Dragashit, për ta arrestuar sipas urdhëresës së gjykatës, por ka lejuar që i njëjti të arratiset.
Në aktakuzë thuhet se Seferi pasi ka biseduar me Mexhait Qerimin rreth çështjes së arrestimit të tij, ka lejuar që i njëjti të futet në shtëpi, me pretekst që të përgatitet dhe më pas ai është arratisur.
Gjithnjë sipas aktakuzës, i akuzuari Seferi nuk ka urdhëruar bastisjen e shtëpisë, objekteve përcjellëse dhe kërkimin e tij, por pa lënë patrullë policore për të vëzhguar shtëpinë, ka urdhëruar ekipin policor që të largohet nga vendi i ngjarjes.