Lëvizja Vetëvendosje! mbajti tubimin e madh në Therandë. Kandidati për kryetar të Komunës, Ibish Ahmeti, tha se Komuna duhet të jetë një hapësirë që u takon të gjithëve që jetojnë në të, dhe ku të gjithë i gjejnë mundësitë dhe mjetet për t’i përmbushur nevojat e tyre ekonomike dhe për të jetësuar të drejtat e tyre politike, shoqërore e mjedisore.

“Komuna sot është tjetërsuar, si territor, si hapësirë, si pushtet dhe si administratë. Është lidhur pas interesit privat dhe është peng e politikës dhe e administratës së korruptuar. Pushteti lokal edhe pse thirret në parimet e vetëqeverisjes lokale, në fakt i ka përjashtuar qytetarët nga vendimmarrja. Deri sot, për fatin e tyre kanë vendosur një grup njerëzish rreth partisë në pushtet”, tha Ahmeti.

Ai tha se qytetarët e Therandës nuk duhet ta durojnë më këtë gjendje, të ndihen të huaj e të diskriminuar në vendin e tyre, vetëm e vetëm se nuk e kanë ndonjë familjarë në administratë të Komunës.

Duke prezantuar Alternativën Qeverisëse të Vetëvendosjes, Ahmeti tha se përmes saj, “ne do ta ndryshojmë se bashku Komunën”. “Më 3 nëntor, dilni masivisht, për ta ndihmuar vetveten, për ta ndihmuar komunën, për ta ndihmuar ndryshimin”, tha Ahmeti.

Leonard Shala, bartës i listës së Lëvizjes për këtë Komunë, u bëri thirrje të gjithë qytetarëve që ta votojnë Vetëvendosjen.

Kryetari i VV-së, Albin Kurti tha se qytetarët e Therandës janë popullsi punëtore dhe e ndershme, e kulturuar dhe patriotike, mirëpo vuajtjet e humbjet e para luftës dhe gjatë luftës nuk u ndalën as pas luftës. “Korrupsion në Komunë, privatizim në ekonomi, mjerim në shoqëri, padrejtësi gjithandej. Këtë gjendje të rëndë e që po vazhdon të rëndohet, mund ta ndryshojnë dhe duhet ta ndryshojnë qytetarët e Therandës”, tha Kurti. /PrizrenPress.com/

Kryeministri i Turqisë, Recep Tayyp Erdogan, ka thënë para qytetarëve të shumtë që ishin mbledhur në sheshin e Prizrenit se Turqia është Kosovë e Kosova është Turqi.

Erdogan ka deklaruar se nuk mund të durojnë më që në rajonin e Ballkanit të derdhen lot, por duan që të ketë paqe, solidaritet mes popujve. Ai ka thënë se duan që rajonin e Ballkanit ta shohin të gjithë si një rajon të paqes, miqësisë dhe vëllazërisë.

“Tani nuk mund të duroj më dhe të derdhen lot dhe gjak në Ballkan. Ne duam që në këtë rajon të zotëroj, paqja, mirësia, solidariteti. Ne duam që të kemi diversitete dhe ato të konsiderohen si kulturë. E kaluara do të mbetet mbrapa”, ka thënë Erdogan.

Kryeministri turk ka shtuar se me ndihmën e zotit këtë rajon do ta kthejnë në rajon të paqes, një rajon me kopsht lulesh.

Erdogan ka thënë se ashtu si stërgjyshit edhe ata do të vazhdojnë të ndërtojnë të ardhmen e dy vendeve. Ai u shpreh se Turqia do të vazhdoj të jetoj në vëllazëri në këto toka.

Ai ka deklaruar se sot po e realizojmëkëtë vizitë në Kosovë, që e ndjejnë vetën si në shtëpinë e tyre.

“Jemi njerëzit me një kulturë, dhe një histori të përbashkët. Mos e harroni këtë, Turqia është Kosovë, dhe Kosova është Turqi”, ka thënë Erdogan.

Kryeministri turk ka thënë se Kosova e Turqia janë aq shumë të afërt saqë edhe autori i himnit të Turqisë është nga Kosova, Mehmet Akif Ersoj./Kosovapress/

Kryeministri i Shqipërisë, Edi Rama ka thënë se Prizreni është qyteti ku jo vetëm njerëzit janë në harmoni, por edhe objektet kulturore që janë afërsisht mes vete.
Rama ka shtuar se Prizreni është i pandarë dhe i pandashëm, ashtu si Kosova është e pandarë dhe e pandashme, sepse qëndron bashkë si një pasuri, sepse objektet që janë në harmoni mes vete, e bëjnë Prizrenin një qytet të çmuar.

“Nuk ka sfond më të bukur sesa historia e këtij qyteti, dhe nuk ka sfond me të bukur se sa sheshi i këtij qyteti për të qenë kryeministrat e Kosovës, Turqisë dhe Shqipërisë, ku mundohen të ndërtojnë se bashku ardhmërinë e tyre”, ka thënë Rama, transmeton KP.

Rama ka shtuar se ndihet i nderuar që gjendet afër dy miqve të tij Erdogan dhe Thaçi.

Aleanca për Ardhmërinë e Kosovës në Rahovec, ka vazhduar fushatën parazgjedhore në fshatin Polluzhë. Para një numri të madh banorësh ka folur kryetari i Nëndegës dhe kandidat për Kuvendin Komunal Selim Hoti.

Ai tha se qeverisja lokale e drejtuar nga Smajl Latifi, për më shumë se dy vjet ka bërë ndryshime të mëdha. “Qytetarëve u është ofruar shërbim më i mirë, investime në infrastrukturë dhe përmirësim i komunikimit me njerëz. Prandaj, ftesa jonë për të votuar AAK-në është e mbështetur në rezultate konkrete”, tha Hoti.

Në vazhdim kanë folur edhe Musa Cena, shefi Shtabit Zgjedhor dhe Fatmir Iska, bartës i listës zgjedhore të AAK-së në Rahovec.

Ata bënë thirrje që të mbështetet Smjal Latifi për kryetar të Komunës, “sepse është dëshmuar me punë e përkushtim të madh”.

Në mbështetje të kandidatit për kryetar të Rahovecit kanë dalë edhe Ibrahim Selmanaj, anëtar i Kryesisë së AAK-së dhe Lahi Ibrahimaj,. “ Qytetarit u duhen shërbime më të mira, infrastrukturë nëntokësore e mbitokësore, përmirësim të kushteve të jetë, gjë që e ka bërë Smajl Latifi me bashkëpunëtorë, prandaj mbështetja me votë është veprim i logjikshëm”

Duke shpalosur programin zgjedhor, kandidati i AAK-së për kryetar të Rahovecit, Smajl Latifi tha se në kohën sa e ka drejtuar komunën janë bërë ndryshime të rëndësishme.

“ Nuk pretendojmë të themi se i kemi kryer të gjitha punët. Para nesh kemi sfida të shumta, mirëpo me vullnetin dhe përkushtimin që kemi do të arrijmë të realizojmë shumë projekte. Aktualisht në fshatin tuaj kemi edhe disa punë që duhet të kryhen, siç është rregullimi i shtratit të lumit, rregullimi i rrugëve të fshatit, pas përfundimit të punimeve në AMF. Po ashtu do të ketë investime dhe mbështetje për sektorin e bujqësisë, respektivisht sektorit të përpunimit të prodhimeve bujqësore. Krejt këto do të bëhen në bashkëpunim me komunitetin, ashtu siç kemi bërë deri më tani”/PrizrenPress.com/

Kryeministri i Turqisë, Rexhep Taip Erdogan dhe ai i Shqipërisë, Edi Rama, do të vizitojnë sot Prizrenin. Erdogan dhe Rama do të shoqërohen nga kryeministri i Kosovës, Hashim Thaçi dhe kryetari i Komunës, Ramadan Muja.

Ata  në orën 15:00  në sheshin “ Shatërvan”, do të mbajnë nga një fjalim para qytetarëve të kësaj komune.

“Ftojmë  të gjithë qytetarët e Komunës sonë, që në mënyrë madhështore të presim, mikun e madh të Kosovës, njëherit qytetarin e nderit të Komunës së Prizrenit z. Rexhep Taip Erdogan i shoqëruar edhe nga kryeministri i Shqipërisë Edi Rama dhe kryeministri ynë Hashim Thaçi”, thuhet në njoftimin e kryetarit të Prizrenit, Ramadan Muja.

Komuna e Prizrenit është përkujdesur që qytetin e Prizrenit ta stolisë dhe përgatisë për protokollin më të lartë institucional e qytetar që pritja e tre kryeministrave të jetë sa më vllazërore, siç e ka në traditë Komuna dhe qytetarët e Prizrenit./PrizrenPress.com/