Adem Demaçi thotë se Fatmir Limaj tashmë ka nisur rrugën e vet në politikë. Ai mendon se ndarja tashmë ka ndodhur, për ata që kanë veshë dhe dëgjojnë jehonën e tupanit që po rrah. Fjala formale, sipas tij, nuk ka rëndësi në këtë rast.

Adem Demaçi thotë se mesazhi që ka dhënë Fatmir Limaj nga Malisheva është shumë i qartë.

Përveç si ndarje, ajo nuk ka si të kuptohet ndryshe.

Veprimtari i çështjes kombëtare, në një bisedë për lajmi.net thotë se Fatmir Limaj tashmë ka nisur rrugën e vet në politikë, për të cilën e ardhmja do të tregojë nëse ka vepruar mirë, ose keq.

“Çdo njeri ka të drejtë të vendosë vetë për fatin e tij. Ka të drejtë edhe të ecë një rruge, ta lërë atë rrugë, të fillojë një rrugë tjetër. Nëse është fjala për politikë apo për çfardo qoftë. Kështu që, në këtë prizëm unë e shoh si shfaqje të vullnetit të vet”, thotë Demaçi.

“Zotëria po mendon që është më mirë që të bashkohet me atë Iniciativën Qytetare që ka lindur, por edhe me Iniciativat tjera që po krijohen në Kosovë. Nuk ka asgjë të keqe si qytetar. E tash, sa do t’i bjerë mirë, ose sa do t’i bjerë keq, e ardhmja do ta tregojë”.

Adem Demaçi thotë se ndarja ka ndodhur, për ata që kanë veshë dhe dëgjojnë jehonën e tupanit që po rrah.

“Ai që ka veshë e dëgjon tupanin. E tupani po dëgjohet. Derisa ai i thërret qytetarët që të bashkohen me këto Iniciativa Qytetare edhe në qytetet tjera, jo vetëm në Malishevë, dhe përderisa thotë se do të jetë me ta dhe pas tyre – ky është largimi”.

“Mendoj që fjala formale nuk ka rëndësi në këtë rast, por ka rëndësi vetë fakti që ai është dakord me një lëvizje të tillë. Është i gatshëm të qëndrojë prapa asaj lëvizjeje dhe kjo tregon që ky Zotëri do të fillojë një rrugë të veten”.

“E ardhmja do të tregojë se sa është me vend dhe sa është e saktë. Më duket se formalisht ai është shkëputur nga PDK”.

Fatmir Limaj, të hënën, në tubimin e mbajtur në Malishevë, nuk u deklarua deri në fund për largimin e tij nga PDK. Ai doli në përkrahje të Iniciativës Qytetare në Malishevë, por nuk i tha “lamtumirë” partisë.

Për Demaçin, Limaj me përkrahjen e Iniciativave Qytetare i ka shkuar deri në fund ndarjes.

“Me fjalimin e djeshëm që ka mbajtur, unë mendoj që deri në fund i ka shkuar ndarjes. Përderisa ai thërret që të organizohen njerëzit prapa kësaj iniciative qytetare, dhe se ai do të jetë me ta, kjo është që t’i shkojë deri në fund. Me brina nuk është ajo që t’i shkojë deri në fund”.

Ministri i Punëve të Jashtme të Kosovës, Enver Hoxhaj, gjatë qëndrimit në Nju Jork është takuar sot me sekretarin e përgjithshëm të Organizatës së Bashkëpunimit Islamik (OBI), Ekmeleddin Ihsanoglu.

Gjatë takimit ndërmjet ministrit Hoxhaj dhe sekretarit Ihsanoglu është biseduar për konsolidimin e shtetësisë së Kosovës, si dhe u ripërsërit qëndrimi se Kosova meriton anëtarësimin në Kombet e Bashkuara.

Dy bashkëbiseduesit u pajtuan po ashtu se procesi i njohjeve ndërkombëtare të Republikës së Kosovës do të vazhdojë dhe se ai është një proces i pandalshëm. Ministri Hoxhaj kërkoi nga sekretari Ihsanoglu që Organizata e Bashkëpunimit Islamik të mbajë në agjendë Kosovën, gjatë punimeve të Asamblesë së Përgjithshme në Nju Jork. Hoxhaj dhe Ihsanoglu diskutuan edhe për krizën në Siri, ku u çmuan përpjekjet e Kosovës për të qenë pjesë e përbashkët e bashkësisë ndërkombëtare në zgjidhjen e këtij konflikti. Ministri Hoxhaj shprehu mirënjohje për përpjekjet e vazhdueshme të sekretarit Ihsanoglu dhe për mbështetjen e dhënë për Kosovën.

Hoxhaj, është takuar edhe me ministrin e Punëve të Jashtme të Jordanisë, Nasser Judeh, të cilin e ka njoftuar për progresin në Kosovë, si dhe për fuqizimin e vazhdueshëm të shtetësisë e subjektivitetit ndërkombëtar. Hoxhaj falënderoi ministrin Judeh për përkrahjen e Jordanisë, si dhe shprehu vullnetin e Qeverisë së Kosovës për fuqizimin e marrëdhënieve bilaterale ndërmjet dy vendeve.

Judeh, vlerësoi progresin në Kosovë, duke theksuar përkrahjen e mëtutjeshme të shtetit të tij për Kosovën. Ministri Judeh shprehu interesimin e Jordanisë për avancimin e bashkëpunimit dhe shkëmbimeve me Kosovën./PrizrenPress.com/

Derisa afrohet 3 tetori, kur zyrtarisht do të nisë fushata zgjedhore për zgjedhjet lokale të 3 nëntorit, atmosfera zgjedhore sa vjen e nxehet, e kjo vërehet në tubimet e çdoditshme që subjektet e ndryshme dhe kandidatët e tyre mbajnë në çdo komunë të Kosovës. Në këtë mënyrë, subjektet politike kanë filluar fushatën shumë kohë para fillimit zyrtar të saj. Njohësit e zgjedhjeve thonë se KQZ-ja nuk duhet të jetë tolerante ndaj sjelljeve të tilla.

Edhe dhjetë ditë na ndajnë në fillimi zyrtar i fushatës zgjedhore për zgjedhjet lokale që do të mbahen më 3 nëntor. Zyrtarisht fushata fillon më 3 tetor, por ndërkohë, partitë politike ka kohë që tashmë e kanë filluar fushatën. Ish kryeshefi i Komisionit Qendror të Zgjedhjeve, Mazllum Baraliu thotë se gjithmonë në KQZ ka ekzistuar një tolerancë e panevojshme ndaj partive politike.

“Është një lloj tolerance e cila nuk do duhej të ndodhte për arsye se i sjellë dëm edhe procesit edhe subjektit politik, ani pse duket ndoshta profitabile dhe dobisjellëse”, tha Baraliu.

Kryetarja e KQZ-se, Valdete Daka thotë se KQZ-ja nuk mund të bëjë asgjë në këtë drejtim, ngase nuk është e sanksionuar me ligj një ndalesë e tillë. Gjithsesi Daka thotë se ndonëse zyrtarisht fillon me 3 tetor, partitë ka kohë që tashmë e kanë filluar fushatën zgjedhore.

“Po, ajo është fushatë zgjedhore, normalisht që është në kuadër të fushatës zgjedhore, por meqenëse nuk është e sanksionuar me ligj për momentin, ne nuk kemi çfarë të ndërmarrim si KQZ. Kjo mbetet në ndërgjegjen e vetë subjekteve politike dhe të kandidatëve të tyre. Për momentin ashtu është e rregulluar me ligj dhe ne e respektojmë ligjin.”, tha Daka për Radio Kosovën.

Por, ish kryeshefi i KQZ-së, Mazllum Baraliu, thotë se KQZ-ja mund të marrë masa ndaj subjekteve që zhvillojnë fushatë elektorale para fillimit zyrtar të fushatës.

“Është në dorën e KQZ-së, jo rastësisht po ju përmend dispozitat e dy ligjeve elektorale, pra rregulla zgjedhore që rregullon fushatën dhe aty parashihen detyrat e subjekteve politike, por edhe masat që mund t’i ndërmarrin organet elektorale, KQZ dhe PZAP, të janë të autorizuara që të veprojnë në rast të shkeljeve të tilla. Përndryshe, tamam puna mos të kishte mekanizma limitues të veprimeve të cilat konsiderohen fushatë para fushatës”, tha Baraliu për Radio Kosovën.

Ditë më parë, Aleanca Kosova e Re i ka bërë thirrje KQZ-së të ndërhyjë dhe sipas ligjit ta ndalojë praktikën të cilën kanë filluar ta aplikojnë disa parti politike duke filluar fushatën politike para datës së caktuar. Përgjigja e KQZ-së ka qenë negative, me arsyetimin se nuk mund ta ndalë fushatën e parakohshme të partive politike, ngase një gjë e tillë nuk është e sanksionuar me ligj.

Shefi i Misionit për Sundim të Ligjit në Kosovë – EULEX në një intervistë në media ka folur për angazhimin e EULEX-it aktualisht në Kosovë dhe për perspektivën e këtij misioni në kohën kur po kërkohet bartja e të gjitha përgjegjësive te institucionet kosovare.

”Misioni i EULEX-it është paraparë të zgjasë deri në muajin qershor të vitit 2014. Zoti Borchard e bëri të ditur se EULEX-i do t’i mbajë disa përgjegjësi ekzekutive sidomos në rastet e krimeve të luftës duke potencuar se ky mision mund dhe do ta luaj një rol shumë më aktiv në Veri të Kosovës për shkak të ndjeshmërisë së situatës dhe pamundësisë që institucionet e Kosovës të sigurojnë një prani dhe veprimtari efektive.

Për KMDLNJ është jashtëzakonisht me rëndësi të zbardhen rastet e krimeve të luftës, fati i personave që konsiderohen si të pagjetur dhe sjellja e përgjegjësve para gjyqit në mënyrë që të marrin dënimin apo pafajësinë në përputhje me provat dhe dëshmitë e tjera. Vetëm në këtë mënyrë do të kemi një satisfakcion për viktimat, familjet e tyre por edhe përmbushje të drejtësisë si parakusht për parandalimin e krimeve të ngjashme në të ardhmen. KMDLNJ, viktimat e luftës por as të dyshuarit për krime lufte nuk i trajton sipas përkatësisë etnike por ekskluzivisht nga aspekti i të drejtave të njeriut.

Në anën tjetër KMDLNJ kërkon që edhe ndaj të dyshuarve për krime lufte, pavarësisht përkatësisë etnike dhe politike të zhvillohen hetime të pavarura, gjykim të drejtë dhe të pandikuar politikisht si dhe të krijohen mundësi për mbrojtje cilësore për të dyshuarit dhe të akuzuarit.

KMDLNj fuqishëm e refuzon paragjykimin e fajësisë apo pafajësisë si mjet të zbatimit të ligjit dhe drejtësisë. Në fakt, paragjykimi është presion mbi institucionet hetimore e sidomos për gjykatat që janë institucionet kompetente për shqiptim të dënimit apo vendim lirues për të akuzuarit.

Kur flet për “Grupin e Drenicës”, Borchard pikërisht paragjykon për procesin me vet faktin se ai deklaron se ky proces do të zgjasë shumë duke bërë me dije se të arrestuarit për aq kohë do të mbahen në paraburgim.

Për aq sa ka informatë KMDLNJ, pozita e Borchard është pozitë politike dhe ai nuk është as gjyqtar hetues, as prokuror e as kryetar i Panelit Gjyqësorë në rastin e “Grupit të Drenicës”. Prandaj, pozita e tij nuk e lejon të ndërhyjë në “Grupin e Drenicës”duke përcaktuar dinamikën e kohëzgjatjes së procesit, duke lavdëruar dëshmitarët në këtë proces por as në proceset e ngjashme.

Shefi i EULEX-it nuk duhet të ngatërrohet me punët e hetuesisë apo gjykatës sepse në këtë mënyrë qartazi llogaritet si presion në këto institucione dhe paragjykim i fajësisë. Le të vendosë gjykata për “Grupin e Drenicës” dhe të akuzuarit e tjerë ndryshe nuk mund të flasim për një gjykim të drejtë, të paanshëm dhe pa ndikime politike! Në të kundërtën mund të konsiderojmë se Borchard, si shef i EULEX-it po i shkel të drejtat e personave të privuar nga liria. Dhe se po ndikon në punën dhe vendimin e gjykatave”, thekson KMDLNJ.

Kandidati për kryetar të Prizrenit nga  Bashkimit Demokratik, Zafir Berisha është mirëpritur nga përfaqësuesit e Shoqatës së  Zejtarëve dhe Afaristëve  “ESNAF”.

Berisha edhe në këtë takim është shprehur i bindur se në zgjedhjet e 3 nëntorit BD-ja do t’i fitojë zgjedhjet në Prizren. “ Ekipi të cilin përfaqësoj unë ka vullnetin dhe guximin për të bërë ndryshime pozitive në qytetin e Prizrenit”, tha Berisha.

Ai premtoi se BD-ja do të fokusohet veçanërisht në zhvillimin ekonomik të qytetit me theks të veçantë në zonat industriale. Berisha tha se edhe në të ardhmën do të bashkëpunojë ngusht me shoqatat zejtare dhe afariste të Prizrenit, të cilat sipas tij, janë një shpresë e madhe për shkak të mundësive që kanë për të sjellë edhe investitorë të huaj në qytetin tonë.

Kandidati Berisha  ia ka dorëzuar Kryesisë së “ESNAF-it”, programin zgjedhor të 3 nëntorit.Ai tha se programi i BD-së është përgatitur nga ekspertë të fushave të ndryshme që ka Bashkimi Demokratik dhe qyteti i Prizrenit. “Ky program është garanci dhe shpresë e vetme për një jetë më të mirë në qytetin e Prizrenit”, tha Berisha.

Kryetari i “ESNAF-it”, Edis Qabrati, ndërkaq e ka njoftuar BD-në për aktivitetet e kësaj shoqate. Ai ai tha se Prizreni si qytet  me traditë të gjatë zejtare dhe afariste, ka nevojë për një klasë politike, e cila mbështet  bizneset e vogla dhe të mesme në Prizren si dhe stimulon zejet  e veçanta, të cilat  janë në shuarje e sipër si zeje të vjetra./PrizrenPress.com/