Rreth orës 14:30 minuta të datës 27 shkurt, tek “Tarazhat” e Mamushës ka ndodhur një kanosje me armë të kalibrit të vogël. Pretekst për kanosje thuhet të jete dëmtimi i disa shtyllave që kanë shërbyer si rrethojë e stallës së viktimës, ka bërë të ditur Policia përmes një komunikate.
Policia ka thënë se ka arrestuar të dyshuarin tek i cili është gjetur dhe sekuestruar një pistoletë e llojit Ekol special 99 e kalibrit 9mm. Lidhur me rastin është informuar prokurori i shtetit e cili ka urdhëruar që i dyshuari të ndalën nën masën e arrestit policor.
“Po ashtu të njëjtën ditë, rreth orës 18:30 minuta një kanosje ka ndodhur në fshatin Kara Shëngjergj”, ka bërë të ditur PK-ja.
Pas daljes së policisë në vendin e ngjarjes është identifikuar i dyshuari, i cili kishte dalë për gjah dhe për këtë kunata e tij është ndjerë e kanosur. Në vazhdën e hetimit të rastit, policia i ka sekuestruar dy pushkë gjahu me leje të skaduar.