Me aktivitete te ndryshme, sot është shënuar përvjetori i 17-të i njërës nga betejat më të lavdishme të UÇK-së në komunën e Prizrenit, asaj të Jeshkovës.
Aktivitetet për shënimin e Betejës së Jeshkovës, kanë filluar me homazhe në Landovicë ku morren pjesë familjarë të dëshmorëve, veteran e invalid të luftës, qytetarë e përfaqësues të institucioneve te ndryshme.
Me këtë rast kryetari i Prizrenit, Ramadan Muja tha se herozimi i djemve më të mirë të vendit të cilët u flijuan për Lirinë e vendit në shumë beteja sikurse ishte ajo e Jeshkovës, e çliruan vendin nga robëria e egër.
Kryetari i degës së OVL të UÇK-së, në Prizren, Selim Krasniqi tha se Beteja e Jeshkovës është ndër ngjarjet më të rëndësishme dhe më të lavdishme të luftës sonë çlirimtare, por ai kishte edhe porosi për shumë bashkëluftëtarë dhe institucione për shumëçka që po i’a zbeh imazhin e UÇK-së.
Për sakrificën e dëshmorëve nuk duhet shtuar shumë, sepse ata ishin dhe do të mbetën sinonimet e Lirisë sonë të shumëpritur, theksoi oficeri i FSK-së, Sejdi Krasniqi.
Ndërkaq, kryesuesi i Kuvendit të Prizrenit, Kujtim Gashi tha se amaneti i dëshmorëve do të jetësohet nga të gjallët që Kosova të jetë shtet ashtu si e deshën ata që u flijuan për Liri. Pas Landovicës, homazhe dhe buqeta lulesh janë vendosur në Lapidarin e dëshmorëve në Atmaxhë dhe në Jeshkovë është vizituar Kulla Muze e familjes së dëshmorit, Agim Shala.
Në Betejën e Jeshkovës së 11 marsit të vitit 1999 ranë në fushën e nderit 21 dëshmorë, 9 nga të cilët prehen së bashku me taborrin e luftëtarëve të nderit në Landovicë, kurse 11 të tjerë konsiderohen të zhdukur. Ata kanë vetëm emër, por jo edhe një varrë ku mund t’ju bëhen nderimet e ditëve përkujtimore. /TV Prizreni/