Asnjëherë nuk po vetëdijesohemi për të mos hedhur mbeturina në vende ku është e ndaluar, aq më pak në ato që e shëmtojnë pamjen dhe ndotin ambientin. Në dy lokacione përgjatë rrugës që lidh qytetin e Prizrenit me Nashecin dhe fshatrat përreth, përfshirë zonën e Hasit, individë të papërgjegjshëm kanë hedhur mbeturina të ndryshme, duke krijuar pika të reja problematike – një dukuri shqetësuese që ka qenë e pranishme në Prizren prej kohësh.
Për këtë çështje, kemi kontaktuar drejtorin e Shërbimeve Publike në Prizren, Çelë Lamaj, i cili, pasi u informua nga ekipi i mediumit tonë, shprehu keqardhjen për faktin se disa qytetarë dhe operatorë të papërgjegjshëm vazhdojnë të krijojnë këto vende të zeza me mbeturina në territorin e komunës. Drejtori theksoi se shqetësues mbetet edhe numri i vogël i inspektorëve të mjedisit.
Drejtori Lamaj deklaroi se komuna do të reagojë për largimin e mbeturinave dhe eliminimin e këtyre pikave të zeza. Ai shtoi se do të shqyrtohen edhe forma preventive për parandalimin e kësaj dukurie, përfshirë vendosjen e kamerave të sigurisë për identifikimin e keqbërësve. Mbeturinat e pranishme pritet të largohen së shpejti nga kompania “Eko Regjioni”, dhe shpresojmë që pamje të tilla të mos përsëriten më, ndërsa të gjithë të kontribuojmë për mbrojtjen e ambientit./tv prizreni/
Përjetoni pushime të paharruar dhe dasma magjike në Hotel “Albes Residence”
