Kryetari i Komunës së Malishevës, Ekrem Kastrati, së bashku me koordinatorët Hafir Rexhaj dhe Arsim Morina, sot takuan ekipin e performancës komunale dhe zyrtarë të administratës të drejtorive dhe sektorëve komunal.
Në këtë takim u bisedua për zbatimin e Vendimit për Thjeshtëzimin e Shërbimeve në Komunën e Malishevës. Ky vendim synon thjeshtimin e shërbimeve të cilat ofrohen nga drejtoritë përkatëse dhe sektorët e administratës në Komunën e Malishevës.
“Ky vendim parashikon që në të gjitha rastet kur qytetari bën kërkesë për një shërbim administrativ, për nxjerrjen e të cilit kërkohet një dokument që lëshohet nga e njëjta drejtori apo nga një drejtori tjetër të komunës, zyrtari përkatës i komunës obligohet që dokumentin e tillë të mos e kërkojë nga pala”, thuhet në njoftimin e komunës.
Një pjesë e këtij vendimi do të përfshijë masa për lehtësimin e qytetarëve dhe institucioneve nga barra administrative, duke përmirësuar shërbimet dhe efikasitetin. Ky vendim hyn në fuqi më 1 janar 2025./PrizrenPress.com/
Përjetoni pushime të paharruar dhe dasma magjike në Hotel “Albes Residence”
