Në seancën e së hënës në Gjykatën Themelore në Prishtinë, është dëgjuar dëshmia e dëshmitarit Tafil Kurtishi, i cili natën kritike të 3 janarit 2023, si këngëtar ishte ftuar të këndojë në “Kobra City”. Ai tha se nga tollovia që kishte ndodhur atë natë, ishin futur në tualet me shoqëri dhe kanë qëndruar aty nga paniku deri erdhi policia.
“Ishte një situatë e paqartë dhe nuk isha i përqëndruar tek ngjarja sepse isha duke bisedu me muzikantin për disa çështje të muzikës. Pastaj, nga tollovia e sipër jemi futur në tualet me shoqërinë, e kemi mbyll derën nga paniku dhe kemi qëndru aty”, tha Kurtishi, raporton “Betimi për Drejtësi”.
Kliko linkun:Facebook
Në këtë rast, Dibran Hoxha i njohur si “Koba” dhe katër të akuzuarit Roland Susuri, Arben Vezaj, Burim Mazreku dhe Jesmir Badalli, akuzohen për rastin e vrasjes së V.C., më 3 janar 2023 në lokalin “Kobra City” në Prizren.
Dëshmitari Kurtishi tha se kanë qëndruar në tualet rreth një orë e 30 minuta ose dy orë, dhe kanë dalë kur kanë ardhë Policia.
Ai tha se ishin të mbyllur kur dëgjuan krismat e armës, ndërsa shtoi se kur kanë dalë nga tualeti, lokali ka qenë i dëmtuar jashtë mase shumë.
Dëshmitari Kurtishi ka deklaruar se përveç pronarit- tani të akuzuarit Hoxha, nuk e ka njohur stafin tjetër të lokalit.
Gjithashtu, ai ka deklaruar se atë natë kanë qenë edhe disa mysafirë nga Shqipëria, por se nuk e di se ku kanë qenë të ulur, por vendi ku ka ndodh incidenti ka qenë afër derës tek hyrja e lokalit.
Kurtishi ka thënë se i akuzuari Hoxha ka pasur një sjellje korrekte, ka qenë i qasshëm me punëtorët dhe mysafirët, si dhe i përgjegjshëm, por që nuk është ekspozuar shumë.
Dëshmitari Kurtishi deklaroi se i akuzuari Hoxha i ka paguar dhe iu ka thënë që të dalin në punë ditën e nesërme. Por, tha se të nesermën e ka parë rastin në lajme dhe se ka qenë e logjikshme se nuk punohet atë natë.
Në këtë seancë është dëgjuar edhe dëshmia e dëshmitares E.K (ish-e dashura e tani të akuzuarit Hoxha), e cila tha se në natën kritike i akuzuari Hoxha e ka kontaktuar rreth orës 4:00 të mëngjesit dhe i ka kërkuar që të takohen në Prizren.
Ajo tha se kur ka arritur tek lokali, kanë qenë dy makina të Policisë dhe i akuzuari Hoxha ka qenë duke biseduar me Policinë.
“Më tha asgjë s’ka ndodhur, thjesht ka pasur një sherr asgjë interesant. Më prit në makinë”, ka thënë dëshmitarja, duke treguar se çfarë kishte ndodhur në lokal.
Gjithashtu, ajo tha se stafin e lokalit nuk i ka parë, por edhe nëse do t’i kishte parë, nuk do t’i kishte njohur.
Prokuroria Speciale e Republikës së Kosovës (PSRK), më 20 shkurt 2024, ka ngritur aktauzë kundër Dibran Hoxhajt i njohur si “Kobra” dhe Roland Susurit, Arben Vezajt, Burim Mazrekut dhe Jesmir Badallit, për vrasjen e shtetasit të Shqipërisë në Prizren një vit më parë.
Në aktakuzën e siguruar nga “Betimi për Drejtësi”, “Kobra”, akuzohet se më 3 janar 2023, në ora 4:10, në afërsi të lokalit të tij “Kobra City”, në magjistralen Prizren-Zhur, me dashje ka privuar nga jeta V.C, duke vënë në rrezik edhe jetën e të dëmtuarve R.T (Sh) dhe A.B.
Deri të rasti, sipas aktakuzës së Prokurorisë kishte ardhur pasi të dëmtuarit nuk ishin pajtuar me faturën e lartë në lokal, duke filluar kështu një zënkë me punëtorët e lokalit.
