Komuna e Malishevës, nën përkujdesjen e kryetarit Ekrem Kastrati, do të organizojë ceremoninë e varrimit për tre viktimat e masakrës së Kralanit, Sabedin Kadri Kryeziu, Vehbi Pajazit Halilaj dhe Mentor Maliq Kryeziu. Ata ishin zhdukur që nga lufta e fundit në Kosovë dhe janë identifikuar pas 26 vitesh kërkimesh, përcjell PrizrenPress.
Kryetari Kastrati ka takuar familjarët e viktimave dhe përfaqësuesit e Shoqatës për Persona të Zhdukur në Malishevë, duke i njoftuar për organizimin e ceremonisë. Homazhet dhe varrimi do të zhvillohen me nderimet e merituara nga Komuna e Malishevës.
Për këtë qëllim, është formuar një Këshill Organizativ, i cili, në bashkëpunim me familjet dhe Shoqatën e të Pagjeturve, do të publikojë së shpejti detajet zyrtare të ceremonisë./PrizrenPress.com/
