Në Teatrin e Qytetit “Bekim Fehmiu” në Prizren kanë filluar provat për shfaqjen më të re “Komedia e Zezë” të autorit britanik Peter Shaffer. Shfaqja vjen nën regjinë e Ilir Bokshit dhe pritet të ketë premierën në javën e parë të muajit qershor.
“Bëhet fjalë për një komedi të jashtëzakonshme që luan me dritën, errësirën dhe situatat absurde që lindin mes tyre”, thuhet në njoftimin e teatrit, përcjell PrizrenPress.
“Komedia e Zezë” është një nga veprat më të njohura të Shaffer-it, ku përmes një strukture të veçantë skenike, publiku përjeton ngjarjet në një mënyrë të përmbysur – aty ku drita në skenë përfaqëson errësirën në histori dhe anasjelltas.
“Jemi të entuziazmuar për këtë projekt dhe mezi presim ta ndajmë me publikun”, vijon njoftimi i Teatrit të Qytetit “Bekim Fehmiu”.
Shfaqja do të vendoset në skenë me një kast të zgjedhur aktorësh dhe është pjesë e repertorit të ri artistik të këtij sezoni në Prizren./PrizrenPress.com
