Malisheva ka siguruar kualifikimet për fazën e parë të Conference League, Llapi barazhin e Suhareka ka rënë nga Superliga.
Të dielën është zhvilluar xhiro e 36-të e Superligës së Kosovës në futboll, ku të gjitha ndeshjet kanë qenë në një orar.
Kësisoji Drita e ka mbyllur kampionatin në vendin e parë me 74 pikë e Feronikeli në vendin e fundit me 15 pikë.
Malisheva ka arritur të marrë një barazim të rëndësishëm 2:2 në transfertë ndaj Prishtinës. Pas pjesës së parë, mysafirët kanë qenë në epërsi 2:0 falë një autogoli të Diar Halilit dhe golit të Drilon Hazrollajt. Megjithatë, Prishtina është rikthyer në pjesën e dytë me gola nga Sinan Kadiri dhe Ronald Sobowale, duke barazuar rezultatin.
Me këtë pikë, Malisheva përfundoi kampionatin me 53 pikë dhe ka siguruar kualifikimet për fazën e parë të Conference League.
Në ndeshjen tjetër, Llapi ka fituar 3:1 ndaj Dukagjinit në “Zahir Pajaziti”. Golat për llapjanët janë shënuar nga Ahmed Januzi në minutat 11-të dhe 39-të, ndërsa Dukagjini ka ngushtuar diferencën në minutën e 61-të përmes Erlis Xhemajlit. Arianit Hasani e ka shënuar golin vendimtar në minutën e 66-të për 3:1.
Me këtë fitore, Llapi mbylli sezonin në vendin e tetë me 47 pikë dhe tani do të luajë në barazh për mbetjen në Superligë kundër Vushtrrisë nga Liga e Parë.
Derbi lokal në Suharekë mes Ballkanit dhe Suharekës ka përfunduar me barazim 2:2. Ky rezultat ka qenë fatkeq për Suharekën, e cila përfundon në vendin e nëntë me 43 pikë dhe rrjedhimisht bie nga Superliga, duke u kthyer në Ligën e Parë për sezonin e ardhshëm.
REZULTATET:
Drita – Feronikeli – 4-1
Ferizaj – Gjilani – 2-2
Llapi – Dukagjini – 3-1
Prishtina – Malisheva – 2-2
Suhareka – Ballkani – 2-2
Marketing
