Radio Vatikani ka përkujtuar sot klerikun shqiptar At Gjergj Fishtën, në 74-vjetorin e vdekjes së tij.
Në këtë përkujtim, Radio Vatikani ka nderuar veprën e këtij njeriu të shquar. “Të flasësh për Fishtën dhe veprën e tij, duhen shumë fjalë, shumë kohë, shumë mahnitje, shumë kureshtje, shumë gërmime, shumë dëshmi…”, është shprehur Radio Vatikani.
Fishta lindi më 23 tetor 1871, në fshatin Fishtë të Zadrimës, ndërsa u nda nga jeta më 30 dhjetor 1940. Brenda këtyre dy datave të rëndësishme, lindjes dhe vdekjes, ai bëri aq shumë, sa rrallë herë ka bërë kush për Shqipërinë.
Ai e pasuroi këtë vend me vlera të paçmuara në shumë fusha, që nga letërsia e deri tek diplomacia ndërkombëtare. Veprat e tij madhështore e ngritën atë jo vetëm në majat e epikës dhe satirës shqiptare, por edhe asaj të huaj, duke e quajtur “Homeri i fundit”.
Ndër të tjera, në këtë përkujtim të shkurtër, Vatikani vuri në dukje dhe epitetet më të zgjedhura të mendjeve të ndritura të kohës për Fishtën.
“Në përfundim të këtij përkujtimi tejet të shkurtër, nuk mund të harrojmë edhe se mendjet më të ndritura të kohës kërkuan për Fishtën epitetet më të zgjedhura, që të shprehnin admirimin e tyre, duke nisur nga Lasgushi, pena e madhe lirike e të cilit i dhuroi pendës gjeniale epike një titull të denjë: “Shkëmb i tokës dhe shkëmb i shpirtit shqiptar”, ka përfunduar Radio Vatikani.